Íþróttir | EM í handbolta | mbl | 31.1.2016 | 18:07 | Uppfært 21:19

Dagur kom, sá og sigraði

Mynd 1 af 4 Dagur Sigurðsson, þjálfari þýska liðsins, gefur skipanir á hliðarlínunni þegar liðið bara sigurorð af Spánverjum í úrslitaleik EM í dag. AFP

Mynd 2 af 4 Vörn Þjóðverja var geysilega sterk þegar liðið lagði Spánverja að velli í úrslitaleik EM í dag. AFP

Mynd 3 af 4 Andreas Wolff, markvörður Þýskalands var í banastuði þegar Þjóðverjar lögðu Spánverja að velli í úrsltialeik EM í dag. AFP

Mynd 4 af 4 Tobias Reichmann, leikmaður Þjóðverja, fagnar einu marka sinna þegar liðið gjörsigraði Spánverja í úrslitaleik EM í dag. AFP

Þýskaland og Spánn mættust í úrsltaleik EM í handknattleik karla í Kraká í Póllandi í dag. Dagur Sigurðsson stýrði þar þýska liðinu til sigurs og varð þar af leiðandi fyrsti Íslendingurinn til þess að fá gullverðlaun á stórmóti í handknattleik í karlaflokki um hálsinn.

Lokatölur í leiknum urðu 24:17 Þjóðverjum í vil, en staðan var 10:6 fyrir Þjóðverja þegar leikmenn gengu til búningsherbergjanna í hálfleik.

Þjóðverjar hófu leikinn betur og léku feykilega öflugan varnarleik og agaðan og skynsaman sóknarleik. Bakvið við sterka vörn þýska liðsins var Andreas Wolff svo í banastuði. Lítið var skorað í leiknum yfir höfuð og fjölmörg mistök litu dagsins ljós.

Staðan var 7:2 Þýskalandi í vil um miðbik fyrri hálfleiks. Þá vöknuðu Spánverjar til lífsins og minnkuðu muninni í þrjú mörk, en staðan var hins vegar 10:6 fyrir Þjóðverja í hálfleik. Aldrei hefur jafn lítið verið skorað í fyrri hálfleik í úrslitaleik á EM.

Þjóðverjar hófu seinni hálfleikinn af ámóta krafti og fyrri hálfleikinn. Þýski varnarmúrinn lét engan bilbug á sér finna og þýska liðið hleypti Spánverjum aldrei nærri sér og sigldu öruggum sjö marka sigri í land.

Þjóðverjar tryggðu sér þar með annan Evrópumeistaratitil sinn, en Þjóðverjar fóru með sigur af hólmi á EM í Slóveníu árið 2004.