„Sala á Landsvirkjun að hluta eða öllu leyti til lífeyrissjóðanna er einkavæðing. Einkavæðing orkufyrirtækja í ríkiseigu kemur einfaldlega ekki til greina. Það sagði ég 2007, 2010 og nú aftur 2014.“
Þetta segir Eygló Harðardóttir, félags- og húsnæðismálaráðherra, á Facebook-síðu sinni í dag en Bjarni Benediktsson, fjármálaráðherra, sagði á ársfundi Landsvirkjunar í gær að hann vildi skoða sölu á hlut í fyrirtækinu. Þá til að mynda til lífeyrissjóða. Ljóst er því að samstaða er ekki um málið í ríkisstjórn.
Eygló vísar í grein sem hún ritaði á vefsíðu sína í desember 2010 þar sem fram kemur að reynslan sýndi að afleiðing þess að fá einkaaðilum orkufyrirtæki væri hærra verð til almennings og verri þjónusta.