Grétari Sigfinni Sigurðssyni hafa borist yfir 300 fyrirspurnir um fyrirhugað leiguflug á hans vegum til Nice vegna leiks íslenska karlalandsliðsins í knattspyrnu við England næstkomandi mánudag.

Frétt mbl.is: Leigir flugvél til Frakklands.

Grétar tilkynnti um flugið í gærkvöldi en í morgun kom þó babb í bátinn.

„Ég missti vélina í morgun. Eitthvert af stóru fyrirtækjunum í Evrópu, ég veit náttúrulega ekkert hvort þetta tengist Íslandi, hirti hana af mér,“ segir Grétar.

„Það er gríðarleg samkeppni og það eru bara varla til flugvélar í Evrópu. Það var einhver til í að borga hærra svo þeir hefðu þurft að fá staðfestingu innan 20 mínútna, sem ég gat auðvitað ekki gefið.“

Hann segir daginn hafa einkennst af miklu stressi en að loks hafi þó farið svo að önnur vél fannst, en því miður þó nokkuð dýrari. Þeir sem sent höfðu fyrirspurn hafi verið látnir vita af því að verðið hafi hækkað um 50 þúsund krónur á mann en áður var ráðgert að hvert sæti kostaði 129.900 krónur. Verðhækkunin virðist þó ekki hafa komið að sök.

„Hún er svo gott sem full. Það eru svona 90 prósent líkur á að við förum út,“ segir Grétar. „Síðast þegar ég vissi, voru 140 sæti farin af 160 en við eigum eftir að fara í gegnum mikinn póst. Svo þetta er mjög líklegt.“

Ein­ung­is er um dags­ferð að ræða, farið verður snemma morg­uns á mánu­dag og komið aft­ur heim um kvöldið eft­ir leik­inn. Fyllist lausu sætin segir Grétar að hægt verði að skrá sig á biðlista.

„Það er möguleiki á að fá aðra svona dýra vél, sem er óþolandi af því að við vorum að vonast til að fá þetta aðeins ódýrara, en þessi möguleiki er alla vega til staðar. Við erum að skoða þetta.“

Hægt er að hafa samband við Grétar á Facebook eða á gretarsigfinnur@gmail.com.

Tengdar fréttir

EM 2016 í fótbolta

Danir slógu Evrópumeistarana úr leik

• Landsliðið tilnefnt til verðlauna – almenningur kýs
• Enska liðið mætti með smá hroka
• Þakklát fyrir boðið til Íslands
• Notkun gagnamagns jókst um 600%

» Fleiri tengdar fréttir

• Blogga um frétt