Fjármálaeftirlitið hefur metið TM hf. hæft til að fara með virkan eignarhlut í Lykli fjármögnun hf. að því er fram kemur í tilkynningu frá Seðlabanka Íslands. Í október á síðasta ári undirritaði TM kaupsamning við Klakka ehf. um kaup á Lykli fjármögnun.
Kaupverð samningsins nam 9,25 milljörðum króna og innihélt ákvæði um að TM muni greiða Klakka hagnað Lykils á árinu 2019. TM ætlar sér að vera með fjármögnun sem hluta af starfsemi sinni í framtíðinni.
Samkvæmt tilkynningu, sem send var út í október þegar kaupsamningurinn var undirritaður, var kaupverðið greitt með handbæru fé, útgáfu á nýju hlutafé upp á 3 milljarða króna og sölu á eignum. Þá kom fram að lánsfjármögnun upp á 3 milljarða króna vegna kaupanna hefði verið tryggð.
Þar kom einnig fram að með kaupunum væri verið að byggja undir nýja stoð í rekstri TM. „Kaupin á Lykli eru í samræmi við stefnu TM og eftirleiðis mun starfsemi félagsins skiptast í þrjár jafn mikilvægar stoðir, vátryggingar, fjármögnun og fjárfestingar. Tækifæri eru til að bæta arðsemi af grunnrekstri Lykils. TM áætlar að hægt verði að ná fram töluverðum samlegðaráhrifum, bæði í tekjum og kostnaði, fjölga fjármögnunarkostum og ná niður fjármagnskostnaði. Þá er stefnt að því að gera fjármagnsskipan hagkvæmari.“