„Ég fagna þessu mjög, þetta eru mikil tímamót og stór tíðindi, ekki síst í sögulegu samhengi,“ segir Hilmar Hildarson Magnúsarson, formaður samtakanna 78, um niðurstöðu Hæstaréttar Bandaríkjanna um hjónabönd samkynhneigðra.
„Mér þykir ekki ólíklegt að þetta muni hafi mikil áhrif í heiminum. Bandaríkin eru stórveldi og það er mikið fylgst með þeim. Það hefur verið mikið rætt um þetta í Bandaríkjunum á undanförnum árum en þetta markar ákveðinn endapunkt,“ segir Hilmar.
Hæstiréttur Bandaríkjanna sló því í dag föstu í dómi sínum í fjórum málum að rétturinn til ganga í hjónaband væri stjórnarskrárvarinn.
Sjá frétt mbl.is: Hjónabönd samkynhneigðra lögleg í Bandaríkjunum
Hilmar segist hafa fylgst vel með baráttunni. „Mörg okkar í Samtökunum eigum vini og kunningja í Bandaríkjunum þannig að við höfum getað fylgst með þessu í gegnum Facebook og í heimsóknum þangað. Þetta er langþráður draumur að verða að veruleika fyrir mörgum, sérstaklega því þetta er niðurstaða Hæstaréttar sem tekur á alríkinu, ekki bara einstöku ríki.“
Hann segir þó jafnréttisbaráttuna eiga langt í land vestanhafs. „Það eru önnur vandamál til staðar eins og hatursglæpir og málefni transfólks sérstaklega og viðhorf fólks. Þetta er langur listi.“
Hæstiréttur getur þó hafa lyft grettistaki í þessum málaflokki því niðurstöður skoðanakannana vestanhafs sýna að þegar ríki hafa lögleitt hjónabönd fólks af sama kyni, hefur viðhorf fólks til slíkra hjónabanda snarbatnað.
„Ég hef fylgst með viðhorfskönnunum í Bandaríkjunum undanfarin ár og ástandinu nú er ekki að jafna við ástandið fyrir tíu árum. Það er miklu meiri stuðningur núna. Þar hefur skipt miklu máli að í hvert skipti sem ríki hefur lögleitt slíka réttarbót hefur það vakið mikið umtal og fengið mikinn stuðning. Síðan skiptir máli að hafa stjórnvöld sem tala fyrir mannréttindum,“ segir Hilmar.