Innlent | mbl | 7.7.2014 | 8:57 | Uppfært 10:22

Tjónið hleypur á hundruðum milljóna

Mynd 1 af 12 Húsið sem hýsti Griffil verður væntanlega rifið Þórður Arnar Þórðarson

Mynd 2 af 12 Skemmdirnar eru gríðarlegar í Skeifunni Þórður Arnar Þórðarson

Mynd 3 af 12 Byrjað er að rífa húsið sem snýr að Bílaleigu Akureyrar Þórður Arnar Þórðarson

Mynd 4 af 12 Lögreglan hefur tekið við stjórn á vettvangi og verður lokað fyrir allri umferð í kringum húsin svo hreinsunarstarf geti hafist Þórður Arnar Þórðarson

Mynd 5 af 12 Fulltrúar tryggingarfélaganna komu að skoða vegsummerki í morgun. Þórður Arnar Þórðarson

Mynd 6 af 12 Enn rýkur úr rústunum Þórður Arnar Þórðarson

Mynd 7 af 12 Húsnæði Rekstrarlands er illa farið eftir eldsvoðann. Þórður Arnar Þórðarson

Mynd 8 af 12 Verslun Stillingar. Þórður Arnar Þórðarson

Mynd 9 af 12 Griffill var hér til húsa Þórður Arnar Þórðarson

Mynd 10 af 12 Rífa þarf útveggi og burðarbita Þórður Arnar Þórðarson

Mynd 11 af 12 Ömurleg sjón blasir við í Rekstrarlandi Þórður Arnar Þórðarson

Mynd 12 af 12 Tólf tíma törn að ljúka. Líkt og alltaf þegar kviknar í þá standa slökkviliðsmenn vaktina og gera það með sóma. Þórður Arnar Þórðarson

Enn rýkur úr rústunum í Skeifunni. Slökkviliðsmenn eru enn að störfum. Þórður Arnar Þórðarson

Það er ljóst að tjónið í Skeifunni hleypur á hundruðum milljóna króna, samkvæmt upplýsingum frá fulltrúum tryggingafélaganna. Lögreglan er að taka við brunavettvanginum af slökkviliði höfuðborgarsvæðisins en einhverjir dagar eru í að hægt verði að ljúka rannsókn. Verslunin Víðir slapp ótrúlega vel og verður opið þar í dag. Önnur fyrirtæki í húsaþyrpingunni sem brann verða væntanlega lokuð í dag.

Öll tryggingafélögin tryggja einhver fyrirtækjanna sem starfa á brunasvæðinu en Sjóvá tryggir Griffil. Þrátt fyrir að byggingin sem hýsir Fönn sé ekki ónýt eru innanstokksmunir væntanlega gjörónýtir og reyk- og sótskemmdir.

Að sögn Ara Guðmundssonar, forstjóra Fannar, hefur hann ekki fengið að fara inn í húsnæðið en hann bíður ásamt starfsfólki sínu í húsnæði veitingastaðarins Spice í sama húsi.

Jóhann Karl Þórisson, sem stýrir aðgerðum á vettvangi af hálfu lögreglunnar, segir að tæknideild lögreglunnar muni taka við rannsókn á eldsupptökum en einhverjir daga muni líða þar til rannsókn lýkur. Tæknideildin mun núna taka yfirlitsmyndir af vettvangi og svo verður væntanlega farið í að rífa húsið þar sem Griffill er til húsa og húsnæði á vegum Fannar þar á móti, sem snýr að bílaleigu Akureyrar.

Ekki verður hægt að fara inn í rústirnar strax því fyrst verður að rífa útveggi og burðarbita, allt verði gert til þess að tryggja vettvanginn og undir þetta taka fulltrúar tryggingafélaganna sem mbl.is ræddi við að loknum fundi þeirra á brunastaðnum í morgun.

Ótrúlegt er hvað verslunin Víðir hefur sloppið vel og verður verslunin opin með hefðbundnum hætti í dag.

Mikla athygli hefur vakið hversu hratt eldurinn breiddist út í gærkvöldi en mikill eldsmatur var á staðnum, fatnaður, bækur og alls konar pappír.

Í dag mun lögregla girða af brunavettvanginn svo fyrirtæki í nágrenninu geti haldið starfsemi sinni gangandi. Hjá bílaleigu Akureyrar eru menn mættir í vinnu en í gærkvöldi voru starfsmenn fengnir til þess að forða bílum fyrirtækisins frá. Nú er háannatími í starfsemi bílaleigunnar og því mikilvægt að hún geti starfað áfram.