„Okkur finnst bagalegt að flugvellinum sé lokað í svona langan tíma,“ segir Svanhvít Friðriksdóttir, upplýsingafulltrúi flugfélagsins WOW air, en yfirvinnubann flugumferðarstjóra mun hafa áhrif á um 20 ferðir flugfélagsins í nótt.
Þjónusta á flugvellinum verður takmörkuð við sjúkra- og neyðarflug frá 02:00 í nótt til 07:00 í fyrramálið, en ástæðan er að tveir flugumferðarstjórar sem áttu að vera á vaktinni í nótt eru veikir og vegna yfirvinnubanns fást ekki flugumferðarstjórar til afleysinga.
Meðan á takmörkuninni stendur eru 20 vélar áætlaðar til komu frá Norður-Ameríku og sjö til brottfarar til Evrópu. Þó er ljóst að yfirvinnubannið mun hafa áhrif á fleiri flug, þar sem tafir á flugi hafa keðjuverkandi áhrif.
„Þetta setur allt úr skorðum og svo koma keðjuverkanir í kjölfarið,“ segir Svanhvít, en bætir við að um leið og flugvöllurinn verði opnaður klukkan sjö í fyrramálið verði farið á fullt við að koma fólki á leiðarenda.
Guðjón Arngrímsson, upplýsingafulltrúi Icelandair segir takmörkunina hafa áhrif á rúmlega 30 flug hjá flugfélaginu í nótt og í fyrramálið. „Þetta eru áframhaldandi truflanir sem þessar aðgerðir hafa í för með sér,“ segir hann og bendir á að síðustu fjóra daga hafi það einnig sýnt sig að flug hafi tafist á morgnanna vegna aðgerðanna.
Þá segir hann ástandið afar slæmt, og bitna á röngum aðilum. „Þetta er ástand sem verður að bregðast við. Þetta veldur tugþúsundum farþega óþægindum og raskar flugi,“ segir hann.
Félag íslenskra flugumferðarstjóra (FÍF) og Samtök atvinnulífsins (SA) fyrir hönd Isavia standa nú í kjaraviðræðum og hefur þeim verið vísað til ríkissáttasemjara. Viðræður hafa staðið yfir frá því í nóvember en síðasti fundur var haldinn 20. maí síðastliðinn. Ríkissáttasemjari hefur ekki boðað til næsta fundar í viðræðunum, segir enn fremur í tilkynningunni.
Yfirvinnubann FÍF hefur staðið yfir frá 6. apríl.
Farþegar sem eiga bókað flug á þessum tíma eru hvattir til að fylgjast með flugáætlunum á www.kefairport.is eða vef síns flugfélags.
Frétt mbl.is: Ekkert áætlunarflug í nótt vegna yfirvinnubanns
Frétt mbl.is: Yfirvinnubann jafngildir verkfalli