Kajakræðarinn sem lést úti fyrir Þjórsárósum sl. laugardagskvöld hét Sigurður Birgir Baldvinsson. Hann var 43 ára gamall og var til heimilis að Hólmaseli í Flóahreppi.
Sigurður lætur eftir sig sambýliskonu, dóttur á fimmta ári og tvo syni sem eru 17 og 19 ára.
Þetta kemur fram í tilkynningu frá lögreglunni á Suðurlandi.
Lögreglunni á Suðurlandi barst á laugardagskvöld tilkynning um að tveir menn væru í vandræðum á kajökum í briminu við ósinn. Þyrlur Landhelgisgæslunnar, björgunarsveitir, sjúkralið og lögregla voru sendar á staðinn.
Þegar björgunarlið kom á vettvang sáust kajakarnir á hvolfi austan við ósinn. Það tókst að hífa annan manninn upp í aðra þyrluna og hinn síðar í hina þyrluna. Flogið var með mennina á bráðamóttöku Landspítalans í Fossvogi, þar sem Sigurður var úrskurðaður látinn.