Annar kajakræðaranna sem bjargað var úr sjónum við ós Þjórsár í gærkvöldi er látinn. Ekki verður, að svo stöddu, greint frá nafni hans. Rannsóknardeild lögreglunnar á Suðurlandi fer með rannsókn málsins.
Ekki hafa fengist upplýsingar um líðan hins mannsins, en eftir því sem mbl.is kemst næst er hann ekki talinn í lífshættu.
Lögreglunni á Suðurlandi barst klukkan 21.13 í gærkvöldi tilkynning um að tveir menn væru í vandræðum á kajökum í briminu við ósinn. Þyrlur Landhelgisgæslunnar, björgunarsveitir, sjúkralið og lögregla hefðu þegar farið á staðinn.
Þegar björgunarlið kom á vettvang sáust kajakarnir á hvolfi austan við ósinn. Allan tímann var símasamband við annan manninn og þyrluáhafnirnar sáu til mannanna í briminu mun vestar. Það tókst að hífa annan manninn upp í aðra þyrluna og hinn síðar í hina þyrluna. Flogið var með mennina á bráðamóttöku Landspítalans í Fossvogi.