Átta kynferðisbrot verið tilkynnt
Setja bókamerki
Tengdar fréttir
Kynferðisbrot
Átta kynferðisbrot hafa verið tilkynnt um og eftir verslunarmannahelgina, og þar af sjö tengd útihátíðum. Þetta staðfestir Hrönn Stefánsdóttir, verkefnastjóri neyðarmóttöku fyrir þolendur kynferðisofbeldis á Landspítala.
Fimm leituðu á neyðarmóttökuna um og eftir helgina, en Hrönn hefur einnig veitt ráðgjöf í einu máli til viðbótar. Þá hefur hún fengið upplýsingar um hin málin tvö.
Fjögur kynferðisbrot í Eyjum
Fjögur brotanna voru framin í Vestmannaeyjum, tvö á Suðurlandi og eitt á höfuðborgarsvæðinu.
Er þetta aukning frá því um verslunarmannahelgina í fyrra þegar sex brot komu upp, og eitt var tengt útihátíð. Spurð um þessa aukningu segist Hrönn halda að hún stafi af vitundarvakningu um kynferðisbrot í samfélaginu, og þá staðreynd að brotaþolar viti að þeir geti leitað sér aðstoðar.
Bæði málin á Suðurlandi komu upp á tjaldsvæðum og eru þau til rannsóknar hjá lögreglu og var allavega einn maður handtekinn í tengslum við seinna málið.
Enginn er þó enn í haldi, en vitað er hverjir hinir grunuðu eru.
Lögreglan í Vestmannaeyjum sagði á Facebook-síðu sinni í gær að þrjú kynferðisbrotamál væru þar til rannsóknar eftir helgina.
Tilkynnt hafi verið um eitt brot aðfaranótt laugardags, á tjaldsvæðinu í Herjólfsdal og hinn grunaði handtekinn. Þá hafi verið tilkynnt um tvö kynferðisbrot til viðbótar aðfaranótt sunnudags. Átti annað brotið sér stað á laugardagsmorgninum í heimahúsi en hitt á tjaldstæðinu í Herjólfsdal. Voru hinir grunuðu einnig handteknir í þeim málum, en ekki hafa verið lagðar fram kærur vegna málanna.
Metfjöldi mála á einum mánuði kom á borð neyðarmóttökunnar í júlí, þegar tuttugu og átta manns leituðu þangað. Samtals hefur 41 einstaklingur leitað til neyðarmóttökunnar í júní og júlí, og 110 það sem af er ári. Í fyrra leituðu fleiri en nokkru sinni á neyðarmóttökuna, en þá voru 169 komur skráðar.
Tengdar fréttir
Kynferðisbrot
„Umsátursástand“
Shakespeare fannst í skókassa
Vonast til að tjaldbúðir við HÍ standi áfram
Telur forsendur fyrir vaxtalækkun
Nemendur í HÍ reistu tjaldbúðir án leyfis
Gígbarmurinn hækkað frá því í gær