Árangurslausri leit lögreglunnar á Suðurlandi, björgunarsveita og Landhelgisgæslu Íslands að konu sem talin er hafa fallið í sjóinn við Dyrhólaey er lokið í bili. Ákveðið hefur verið að bíða með áframhald leit þangað til á fimmtudag.
Þetta staðfestir Sveinn Kristján Rúnarsson, yfirlögregluþjónn hjá lögreglunni á Suðurlandi, í samtali við mbl.is.
„Leitinni er lokið í dag. Það var á milli klukkan 14 og 15 sem síðustu verkefnin kláruðust og leitin bar ekki árangur,“ segir Sveinn. Hann telur að milli 60 og 70 manns hafi komið að leitinni í dag auk áhafnar þyrlu Landhelgisgæslunnar.
Konunnar hefur verið saknað síðan á föstudaginn 20. desember. Hún heitir Rima Grunskyté Feliksasdóttir og er erlendur ríkisborgari en hefur verið búsett hér á landi í mörg ár.
Spurður hvort að leit hafi verið hætt vegna myrkurs eða veðurs segir Sveinn að svo hafi ekki verið. „Við gerum ekki ráð fyrir því að við séum í lífleit. Við settum niður ákveðin svæði sem við erum að leita á, þau voru kláruð og það bar ekki árangur.“
„Við erum svolítið að horfa á sjóinn, hvernig hann hegðar sér. Það er allt sem bendir til þess að hún hafi farið fram af klettinum í sjóinn,“ bætir hann við.
Svæðið sem leitað var á í dag er strandlengjan frá Þorlákshöfn að Skaftá.