Hefur ekki áhyggjur af úrræðum í Grikklandi
Setja bókamerki
Jón Gunnarsson dómsmálaráðherra segist ekki hafa áhyggjur á því að fatlaður maður sem var meðal þeirra 15 hælisleitanda sem voru flutt úr landi til Grikklands í gær fái ekki viðeigandi úrræði á vegum grískra stjórnvalda.
Harka lögreglu í garð þeirra 15 hælisleitenda sem sendir voru úr landi hefur verið mikið gagnrýnd og ekki síst vegna meðferðar á Hussein Hussein, sem notast við hjólastól.
Sema Erla Serdar, stjórnmála- og Evrópufræðingur og formaður Solaris sagði það vera „hrikalegt að horfa á lögregluna meðhöndla hann þarna og reyna að troða honum inn í bíl.“
/frimg/1/37/44/1374447.jpg)
Jón Gunnarsson telur að lögreglan hafi athafst rétt eftir atvikum.
„Já ég tel það. Þessi fatlaði maður var fluttur í hjólastól flestum af þeim leiðum sem þurfti að flytja hann í þessu ferli, í sérútbúnum hjólastólabíl,“ sagði Jón að loknum ríkisstjórnarfundi í samtali við mbl.is í dag.
„Í þessu tilfelli þar sem þurfti að bera hann inn í venjulegan fólksbíl, voru aðstæður sem sköpuðust sem gerðu það að verkum að lögreglan hafði ekki önnur úrræði á þeim eina legg. Það fylgdi honum síðan rafmagnshjólastóll til Grikklands og hann varð eftir þar fyrir hann til afnota.“
Fái viðeigandi úrræði í Grikklandi
Lögmaður Husseins telur engar líkur á því að hann muni fá þá læknisaðstoð sem hann þarf á að halda í Grikklandi. Jón telur að Hussein muni fá viðeigandi úrræði.
„Í þeim tilfellum sem við erum að flytja fólk til Grikklands eða annarra landa þá er það gert í samvinnu við viðtökuríkið. Fyrir liggja allar upplýsingar hjá viðtökuríkinu um það fólk sem er að koma og samþykki þess ríkis, í þessu tilviki Grikklands, á að taka á móti því.
Ég hef ekki áhyggjur af því að hann fái ekki viðeigandi úrræði á vegum grískra stjórnvalda þar sem þau eru að fullu upplýst um stöðu fólksins sem er að koma og hafa samþykkt að taka á móti,“ segir Jón.
Lögregla hafi gert það sem átti að gera
„Það var komin niðurstaða í málum þessa fólks á tveimur stjórnsýslustigum, bæði hjá Útlendingastofnun og kærunefnd útlendingamála og lögreglan er auðvitað að framfylgja því sem henni ber að framfylgja í brottvísun á fólki sem hefur fengið hér synjun.
Þetta krefst mikils undirbúnings og við sjáum það að upphaflega stóð til að flytja 28 manns af landinu. Í þessari ferð þá náðist að flytja 15, 13 fundust ekki. Að þessu leyti er tímasetningin erfið fyrir lögregluna að ná utan um þetta. Það er einfaldlega staðan í þessu máli.“
Spurður um það að lögregla hafi beðið starfsfólk Isavia um að beina kösturum og flóðljósum að fréttafólki svo ekki væri hægt að taka myndefni af flugvélinni segir Jón: „Ég þekki ekki til þess máls“.
Kolbeinn sýknaður
Skoða hvort eitthvað fari úr hrauntjörninni
Margir ölvaðir og illa áttaðir
Yfirgnæfandi meirihluti með erlent ríkisfang
„Hugsanlega eru þeir fleiri en einn“
Gagnasöfnun hafin í tengslum við viðbrögð lögreglu
Umsóknum fjölgaði í kjölfar eldgossins
Ferðamenn festu sig í snjó á Kísilvegi