Liðsstjórinn Frank Williams segir nýgerðan samning sinn við Jenson Button um að keppa fyrir Williams á næsta ári vera „skotheldan“. Hafnar hann staðhæfingum BAR-liðsins um að Button sé bundinn því liði áfram.

Í ljósi yfirlýsinga BAR um hið gagnstæða sagði Williams við blaðamenn í dag að hann væri sannfærður um ágæti samningsins og kvaðst styðjast við traust lögfræðilegt álit í því efni.

„BAR missti af tækifærinu á að halda í Jenson og ég hef engar efasemdir um að hann muni keppa fyrir Williams á næstu tveimur árum - eins og ökuþórinn kýs sjálfur,“ sagði Williams.

Hann segir lið sitt hafa staðfest samkomulag við Button nokkrum dögum fyrir þýska kappaksturinn í Hockenheim, eftir að umboðsmenn Buttons hefðu haft samband við hann og sagt honum af tækifærinu.

„Við vildum hefja prívat viðræður við BAR til að fara í gegnum öll samningsatriði en BAR hefur slegið boltann úr höndum okkar, farið í fjölmiðla, og við höfum því neyðst til að útskýra okkar stöðu,“ segir Williams.

Frank Williams segist hafa sett sig í samband við BAR-stjórann David Richards rétt eftir að hann hefði átt að hafa fengið tilkynningu um samkomulagið og lagt til að þeir ræddu málin í kyrrþey.

„Við töldum engar líkur á því að geta ráðið Button en ég hef fengið tilboð af þessu tagi áður og sem keppnislið er ekki annað hægt en taka því,“ játaði Williams.

Tengdar fréttir

Formúla-1/BAR og Williams þræta um Jenson Button

Williams býður í Button

• Button segir slæma ráðgjafa hafa skaðað orðspor sitt
• Button ákveðinn í að fara til Williams 2006
• BAR-liðið ánægt að halda í Button
• Williams og Button lýsa vonbrigðum

» Fleiri tengdar fréttir

• Blogga um frétt