Viðskipti | mbl | 13.2.2015 | 8:35

Glæpamenn fundu skjól hjá HSBC

HSBC bankinn reyndist mörgum glæpamanninum vel EPA

Útibú HSBC bankans í Sviss faldi háar fjárhæðir fyrir fólk sem er grunað um alvarleg brot, þar á meðal eiturlyfjasölu, spillingu og peningaþvætti. Þetta er meðal þess sem kemur fram í skjölum sem Guardian hefur undir höndum.

Þrátt fyrir að heimilt hafi verið með lögum allt frá árinu 1998 að kanna nánar bakgrunn viðskiptavina sem mögulega tengjast þekktum spillingarmálum í Afríku, svo sem sölu blóðdemanta ofl. þá virðist það ekki hafa verið gert hjá HSBC í Sviss.

Meðal viðskiptavina bankans eru kenísku kaupsýslumennirnir Deepak Kamani og Anura Perera, en þeir áttu reikninga í bankanum þrátt fyrir að hafa tengst spillingarmálum sem fjallað hefur verið um opinberlega.

Sá sem rannsakaði spillingarmál þeim tengdum, John Githongo, þurfti að flýja land þar sem ráðherrar í Kenía veittu honum ekki stuðning. Hann sýndi fram á í skýrslu sem birt var árið 2006 að þeir hafi hagnast umtalsvert á viðskiptasamningum í kjölfar þess að hafa greitt stjórnmálamönnum í Kenía mútur.

Fjölmargir eru nefndir til sögunnar í frétt Guardian. Þar á meðal spænski verktakinn Arturo del Tiempo Marques sem átti 19 reikninga hjá HSBC, alls 2,5 milljónir punda. Á sama tíma var hann uppvís að stórfelldu fíkniefnasmygli. Hann afplánar nú sjö ára fangelsisdóm á Spáni fyrir smygl á meira en tonni af kókaíni.

Auk hans virðast mexíkóskir eiturlyfjabarónar, austurevrópskir bankamenn og afrískir glæpamenn hafa verið stórir viðskiptavinir bankans.