Björk á lista yfir áhrifamesta tónlistarfólkið

Hið virta tónlistartímarit Mojo hefur, með hjálp lesenda sinna, sett saman lista yfir 20 áhrifamestu tónlistarmenn síðustu 20 ára. Til tíðinda heyrir fyrir okkur Íslendinga, að Björk Guðmundsdóttir var valin á listann.

Björk situr í 13. sæti listans, fyrir ofan þekkta tónlistarmenn og hljómsveitir á borð við Amy Winehouse, Arctic Monkeys, Blur og Nick Drake. Efst á listanum er Radiohead, þar fyrir neðan er Bob Dylan og neðar á listanum má finna nöfn á borð við Johnny Cash, Kanye West, David Bowie og Nirvana.

Einstakur hljóðheimur, einstök rödd

Björk er sögð hafa þróað sinn einkennandi stíl með tónsmíðum sínum á vettvangi íslenskrar pönk- og síðar poppsenu. Sem liðsmaður sveitarinnar Sykurmolanna er sveitin sögð hafa náð forskoti á aðrar poppsveitir en að Björk hafi síðan skotist upp á stjörnuhimininn með sólóferli sínum, snemma á tíunda áratugnum.

Í umfjöllun Mojo segir að þá hafi Björk gert tónlist á eigin forsendum, djarfa og metnaðarfulla tónlist sem er breið í skírskotun sinni með tilliti til stefnu og tímabila.

Á þeim stalli er Björk sögð hafa verið á allar götur síðan og segir í umfjöllun Mojo að hún sé umfram allt sjálfstæð. Svo segir að hljóðheimur Bjarkar sé eitthvað sem ekki sé hægt að leika eftir, rödd hennar á sama tíma barnsleg og lifuð og algjörlega einstök. Þá segir að ný plata Bjarkar, sem gefin er út í þar til gerðu smáforriti, sé vitnisburður um það hvernig Björk er alltaf einu skrefi á undan öllum öðrum.

Listinn í heild:

1. Radiohead
2. Bob Dylan
3. White Stripes
4. Tom Waits
5. David Bowie
6. Johnny Cash
7. Nirvana
8. Nick Cave
9. Jeff Buckley
10. U2
11. Kanye West
12. Arcade Fire
13. Björk
14. Paul Weller
15. Arctic Monkeys
16. Amy Winehouse
17. Arthur Russell
18. Blur/Damon Albarn
19. Nick Drake
20. The Flaming Lips

• 1 blogg um fréttina

Bloggað um fréttina

• P.Valdimar Guðjónsson: Aftur blómaskeið Bjarkar vonandi.