Ólafur Páll Gunnarsson, dagskrárgerðarmaður og einn þekktasti útvarpsmaður ríkisútvarpsins, tjáir sig í dag um þá ákvörðun opinbera hlutafélagsins að taka þátt í Eurovision-söngvakeppninni.
„Að taka enga afstöðu er afstaða. Afstaða með þeim stóra og sterka sem kúgar, níðist á og drepur,“ skrifar Ólafur Páll, best þekktur sem Óli Palli, á Facebook.
„Það að mæta í söngpartí með morðingjum – þó svo þeir séu í glimmergöllum – er afstaða. Og heimurinn heldur áfram að farast meðan við horfum aðgerðalaus á,“ bætir Óli Palli við.
Greint var frá því á laugardag að ríkismiðillinn hygðist ekki fara fram á að Ísrael yrði vikið úr Eurovision. Tekið var fram að 3.000 undirskriftir væru þá á lista þar sem skorað er á ríkisútvarpið að neita þátttöku, verði Ísrael ekki vísað úr keppninni.
Nú eru þær rúmlega sex þúsund talsins, ef marka má það sem fram kemur á síðunni sem hýsir undirskriftalistann.