Húseyjarkvísl stefnir í slakt meðalár

Húseyjarkvísl er ein af þessum skemmtilegu tveggja stanga ám sem oft gefa ótrúlega veiði, sérstaklega þegar horft er til stangafjölda. „Það hefur bara gengið mjög vel hjá okkur. Það eru komnir 76 laxar í bók og við getum ekki kvartað í þessu árferði,“ sagði Valgarður Ragnarsson, leigutaki að Húseyjarkvísl í Skagafirði, í samtali við Sporðaköst.

„Síðasta holl var með tólf laxa og sá töluvert af fiski í ánni. Mér sýnist á þessu að við séum að fara að enda í svona 120 til 160 löxum. Meðalveiðin hjá okkur er um 200 laxar á sumri. Þetta stefnir í lélegt meðalár hjá okkur,“ sagði Valgarður eða Valli eins og hann er kallaður. Þegar spurt er um magn af fiski í ánni svarar hann að það sé algerlega í flútti við veiðina. Það þýðir að það er heldur minna en í meðalári.

„Þó að kvíslin fari aldrei undir 5,7 rúmmetra þá er þetta erfitt. Vatnið er fúlt og staðið. Fiskurinn gengur illa upp ána. Við vonum að um leið og kólni aðeins þá fari hlutirnir að gerast. Það er einmitt útlit fyrir kuldakafla og það hentar okkur vel. Svo er sjóbirtingurinn að fara að mæta og það hressir upp á þetta.“

Valli segist gjarnan hafa viljað fá meira af smálaxi en það er töluvert af stórlaxi í Húseyjarkvísl.

„Við erum með einhverja 45 tveggja ára fiska í bók þannig að restin er smálax, en þeir mættu vera fleiri. Þetta stefnir í lélegt meðalár hjá okkur,“ sagði Valli í samtali við Sporðaköst.

Nú stefnir í rigningar norðan heiða en Valli hefur efasemdir. Það þurfi hreinlega syndaflóð. „Það rigndi um daginn og rigndi bara helling og hún fór úr sex rúmmetrum í 7,4 rúmmetra. Svo hætti að rigna og hún datt hratt niður í sex rúmmetra aftur. Það eina sem gæti breytt þessu er vikurigning og að allt fari í kakó.“

Valli hefur ekki landað hnúðlaxi, en hefur hins vegar séð þá og er það eins og í flestum ám á Íslandi þetta sumarið.

• Blogga um frétt

Seinustu hundraðkallar sumarsins