Brast á með mokveiði þegar hlýnaði

Eldvatnið í Meðallandi er að skríða í hundrað birtinga og verður það að teljast gott í ljósi aðstæðna framan af apríl sem var meira í ætt við vetur en vor. Nú þegar hlýnaði komst hreyfing á birtinginn og veiðin glæddist mjög mikið.

Þeir Valgarður Ragnarsson og Ólafur Garðarsson lönduðu sextán birtingum á tveimur dögum í Eldvatninu. Nánast allir þessir fiskar voru teknir á púpur. Sá stærsti var engin smásmíði eða 86 sentímetrar og veiddist hann í Þórðarvörðuhyl.

Valgarður Ragnarsson sleppir birtingi í Eldvatni. Skóflulíkur sporðurinn sendi góða gusu upp í loftið. Ljósmynd/ÓRG

Þeir félagar luku veiðum á miðvikudag en eins og sjá má á rafrænu veiðibókinni, fyrir Eldvatn, á anglingiq.com var þar einnig góð veiði í gær og er heildarfjöldi sjóbirtinga kominn í 92 stykki. Þegar haft er í huga að færð og veður settu stórt strik í reikninginn er ljóst að Eldvatn er að standa undir nafni.

Aðstæður er nokkuð öðruvísi í Eldvatninu þetta vorið. Kunnugir telja að þetta sé allt um það bil tveimur vikum á eftir meðal vori.

Þetta er Elvar Friðriksson með 79 sentímetra sjóbirting úr Húseyjarkvísl. Ummálið var 55 sentímetrar. Myndin tengist ekki fréttinni. Bara birtum hana hér því svona flottir birtingar eru sjaldséðir á vorin. Ljósmynd/Aðsend

Bestu veiðistaðirnir í Eldvatni í vor hafa verið Villi sem hefur gefið 21 birting og þar á eftir kemur Þórðarvörðuhylur með sautján birtinga. Stærsti fiskur til þessa er 89 sentímetra birtingur sem veiddist á Hundavaði.

• Blogga um frétt

Seinustu hundraðkallar sumarsins