Norsku rekkafararnir skutluðu 24 laxa í Hrútafjarðará í dag. Fleiri voru særðir. Þetta þýðir að samtals hafa 38 eldislaxar veiðst í ánni síðsumars. Stofnstærð laxins í ánni í ár er metin um tvö hundruð fiskar. Kafararnir halda áfram í Hrútafjarðará á morgun þar sem vitað er um fleiri eldislaxa.
Áhættumat vegna eldis í sjókvíum er fjögur prósent af stofnstærð. Þar er miðað við mögulega strokulaxa sem ganga í einstaka á. Í Hrútafjarðará var því marki náð með átta löxum. Þeir eru hins vegar að verða um tuttugu prósent miðað við áætlaða stofnstærð í ár.
Rekkafararnir ráku upp stór augu þegar þeir komu í veiðistaðinn Stokk. Þar náðu þeir sautján eldislöxum og telja sig hafa hreinsað upp eldislaxinn í þeim stað. Vitað er um laxa í veiðistaðnum Surti og verður hann skoðaður á morgun.
Eftir því sem Sporðaköst komast næst er bændum og landeigendum mjög brugðið við þessi tíðindi en ljóst er að ef ekkert hefði verið að gert hefði innblöndun í stofn Hrútafjarðarár orðið gríðarleg. Stutt er í hrygningu hjá laxi í Hrútunni og það kom mönnum óþægilega á óvart að í nokkrum hyljum fannst stakur eldislax með þremur til fjórum villtum löxum.
Veiði í Hrútafjarðará í sumar var 186 laxar og er það mjög lélegt ár.
Áhættumat vegna eldis í sjókvíum er sprungið þegar horft er til Hrútafjarðarár, Blöndu og Laxá á Refasveit. Í Blöndu hafa drepnir 53 eldislaxar og 17 í Laxá á Refasveit. Ljóst er að ef bjarga á villta íslenska laxastofninum sem er einstakur í heiminum þarf að grípa til aðgerða strax.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |