Hundrað laxar á átta stangir - T&S í Jöklu

„Það er til á þar sem laxastofninn hefur stækkað síðustu ár.“ Með þessum orðum hefst grein í nýjasta tölublaði Trout and Salmon um Jöklu. Umfjöllunin er hvorki meira né minna en tíu síðna grein hlaðin lofi á þessa „nýju“ laxveiðiá og fær Þröstur Elliðason leigutaki og frumkvöðull laxveiði í Jökulsá á Dal sem í daglegu tali er nefnd Jökla, sinn skerf af hrósinu.

Greinarhöfundur, Jim Coates veiddi Jöklu í júlí í sumar sem leið ásamt William Daniel sem vinnur með Þresti Elliðasyni að sölu og markaðssetningu á Jöklu til erlendra veiðimanna. Lárus Karl Ingason og Jim sjálfur tóku þær myndir sem prýða frásögnina.

Jim lýsir því í upphafi hvernig landslag Jöklu og nágrennis gerir hann nánast orðlausan. Hann líkir því við Skotland og Kólaskaga en svo á milli koma kaflar sem eru einfaldlega bara á Íslandi.

Í greininni rekur hann tilurð Jöklu, ef svo má segja. Þegar Hálslón varð til og megnið af jökulleirnum settist þar til botns og í framhaldi varð Jökla tær og hentugra búsvæði fyrir laxinn. Eftir sem áður voru tvö verkefni sem voru lykilatriði í að koma Jöklu á þann stað sem hún er á í dag. Sprengja haft sem var í ánni til að opna hrygningarstöðvar og fiskveg lengra fram á Dal. Svo var það hitt. Þröstur fór í að hjálpa náttúrulega stofninum með því að ala seiði og sleppa.Jim gerir skýran greinarmun á annars vegar ám sem byggja alfarið á seiðasleppingum og þeirri hjálp og flýtimeðferð sem Þröstur fór í með stofninn í Jöklu. Hann segir Þröst „heilann“ á bak við verkefnið og þar er engu logið.

Hugguleg lesning á laugardagsmorgni. Greinin er jákvæð umsögn um Jöklu á tímum þar sem lítið er um jákvæðar fréttir þegar kemur að laxastofnum. Já það er til á þar sem laxastofn fer stækkandi. Ljósmynd/ES

Fyrirsögn greinarinnar er „DYNAMITE FISHING“ og vísar þar bæði til þeirra aðgerða sem heimamenn fóru í að sprengja niður fyrirstöðu og hitt að veiðin fannst honum mögnuð. Jim veltir fyrir sér hvernig hefði gengið að fá leyfi fyrir sprengingum hjá yfirvöldum í Bretlandi. Hann veltir líka fyrir sér hvað Þröstur gæti gert fyrir árnar þeirra - sem sagt á Bretlandseyjum.

Það er ekkert skilið eftir í greininni. Fjallað er um yfirfallið sem stöðugt vofir yfir Jöklu þegar líður fram á sumar. Kemur fram að í meðalári er dagsetningin 20. ágúst en síðasta sumar hafi það gerst mun fyrr. Á köldu sumri geti yfirfallið komið í september og Jim bendir á í glettni að slík sumur geti komið á Íslandi.

Jim klikkir út með því að þær fjórar nætur sem hann dvaldi í Jöklu í júlí hafi hundrað laxar veiðst á stangirnar átta. Yfirfallið kom snemma úr Hálslóni í fyrra. Þegar það gerist verður áin jökullituð og veiðin verður nánast ómögulega nema í hliðaránum. Í fyrra var mokveiði í Jöklu þegar þessi tími rann upp. Samt fór Jökla í 520 laxa í heildarveiði. Haldi áfram sem horfi og yfirfallið komi ekki fyrr en í lok vertíðar á Jökla inni að fara vel yfir þúsund laxa.

Þröstur Elliðason sem er með Jöklu á leigu fær hrós og viðurkenningu í greininni. Hann segist finna það núna að Jökla sé komin á kortið í hinum alþjóðlega veiðiheimi. Ljósmynd/Strengir

Grein Jim Coates er mikil lofgjörð um Jöklu og það á tímum þar sem lítið er um góðar fréttir af laxastofnum Atlantshafsins. Hún vekur líka athygli á laxveiðum á Íslandi almennt. Þröstur Elliðason sagði í samtali við Sporðaköst að hann hefði þegar fundið fyrir miklum áhuga og fengið fyrirspurnir vegna greinarinnar. Hann segir greinilegt að Jökla sé komin á kortið sem spennandi valkostur í laxveiði og hafi hann fengið það staðfest á þeim sýningum erlendis sem hann hefur sótt í vetur.

Trout and Salmon hefur verið gefið út óslitið frá árinu 1955 og er eitt af virtari tímaritum í Evrópu um sportveiði. Á forsíðu segir að T&S hafi verið rödd sportveiðinnar frá 1955.

• Blogga um frétt

Seinustu hundraðkallar sumarsins