Stangaveiðifélag Reykjavíkur skilaði ríflega fjörutíu milljóna króna hagnaði síðasta ár. Eigið fé félagsins hefur verið styrkjast undanfarin ár og hefur SVFR nú náð sínum fyrri styrk, eins og það er orðað á heimasíðu félagsins. Er þar horft til þess að eftir erfið ár í kjölfar efnahagshrunsins á Íslandi er eigið fé nú orðið meira í krónum talið en var árið 2007. Eigið fé er nú að nálgast 140 milljónir króna eftir að hafa verið neikvætt á árunum 2011 til 2016.
„Nokkrir samverkandi þættir skýra bætta afkomu SVFR; agi í rekstri félagsins, bættir innheimtu– og skráningarferlar, öflugt starfsfólk, fjölgun félagsmanna og góð sala veiðileyfa,“ segir í tilkynningu frá félaginu á heimasíðu félagsins þar sem gerð er grein fyrir afkomu síðasta rekstrarárs félagsins.
Upplýst er jafnframt að heildartekjur námu 644,5 milljónum króna á síðasta ári.
Ragnheiður Thorsteinsson formaður SVFR er að vonum ánægð með stöðuna og segir skipta miklu máli fyrir félagið að hafa náð að vinna sig upp úr þeim öldudal sem að baki er.
En hvernig gengur veiðileyfasala núna?
„Þegar við hörfum til félagsánna okkar þá hefur hún gengið heilt yfir vel. Laus veiðileyfi er að finna á vefsölunni okkar sem er galopin allan sólarhringinn. Við finnum hins vegar fyrir þeirri stöðu sem Sporðaköst lýstu um stöðuna á útlendingamarkaði. Þar er farið að hríma og sá markaður er orðinn mun erfiðari. Já frostrósirnar þar leyna sér ekki og við finnum fyrir tregðu á þeim markaði. Því er eitthvað af lausum hollum ef íslensk fyrirtæki vilja bregða sér í veiði.“
Aðalfundur Stangaveiðifélags Reykjavíkur verður haldinn 29. febrúar og þar verða reikningar félagsins lagðir fram og kosið um þau embætti sem þörf er á.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |