Fyrstu vorlaxarnir sem hafa veiðist á Írlandi og í Skotlandi eru fáir og langt á milli þeirra. En, og það er stórt en. Þeir eru fleiri en í fyrra og tóninn í veiðiáhugafólki á þessum slóðum er jákvæðari en síðustu ár. Erfitt er að segja nákvæmlega til um af hverju það stafar en sá tónn er þó rökstuddur með aðeins fleiri fiskum á þessum fyrstu vikum veiðitímans.
Þeir veiðimenn sem Sporðaköst hafa verið að ræða við á þessum slóðum síðustu daga segja í raun og veru allir það saman, með mishörðum skoskum eða írskum hreim. „Þetta er það snemmt að það er lítið að marka stöðuna. En við erum að heyra af fleiri fiskum.“ Þessi tilvitnun er samsuða úr þeim svörum sem hafa borist.
Myndir á samfélagsmiðlum eru fleiri en í fyrra og í raun fleiri en síðustu ár. Þessar myndir gleðja og fiskarnir eru svo magnaðir. Hvítir, þykkir og með marglita silfurgljáa sem gjarnan skín af nýgengnum fiski.
Fiskarnir sem hafa verið að veiðast þessar fyrstu vikur eru á bilinu átta pund og upp í tuttugu plús. Vel haldnir og þykkir.
Dagurinn í dag var sá líflegasti til þessa í skosku ánum. Flottum sautján punda hæng var landað í ánni Tay og fullyrti veiðimaðurinn sem fékk hann að hann hefði verið að koma inn á flóðinu. Sett var í nokkra fiska í North Esk og tveimur landað. Nokkrir misstir. Það virðist vera aðeins stígandi í þessu eins og þetta á að vera. Margir benda þó á að lítið sé að marka stöðuna fyrr en í apríl. En þeir eru að reitast upp og það er jákvætt.
Áin Spey gaf lax á opnunardegi og sama má segja um North Esk en þær eru báðar fremur norðarlega í Skotlandi. Sömu sögu er að segja af Oich sem rennur í Loch Ness. Staðan er svipuð að á Írlandi en þar hafa undanfararnir verið að veiðast og var nýgengnum löxum landað þar í vikunni á nokkrum stöðum.
En eins og sagði í upphafi, þeir eru fáir og langt á milli þeirra en engu að síður fleiri en í fyrra. Hvort þetta er eitthvað fyrir íslenska veiðiáhugamenn til að lesa í er spurning. Hins vegar eru þeir vel haldnir og það bendir til góðra skilyrða á fæðuslóð.
Laxveiðitímabilið á Íslandi hefst 1. júní þegar Urriðafoss í Þjórsá opnar. Þangað til eru ekki nema 104 dagar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |