*HRAFNHILDUR Skúladóttir , landsliðskona í handknattleik, meiddist á fingri á æfingu hjá SK Aarhus á föstudag og lék þar af leiðandi ekki með liðinu gegn VRI í næstefstu deild danska handknattleiksins á sunnudag.
*HRAFNHILDUR Skúladóttir, landsliðskona í handknattleik, meiddist á fingri á æfingu hjá SK Aarhus á föstudag og lék þar af leiðandi ekki með liðinu gegn VRI í næstefstu deild danska handknattleiksins á sunnudag. Þrátt fyrir fjarveru Hrafnhildar, sem verið hefur einn besti leikmaður liðsins á keppnistíðinni, vann SK Aarhus öruggan sigur, 31:25. Á heimasíðu SK Aarhus er vonast til að Hrafnhildur verði klár í slaginn á ný þegar liðið mætir Silkeborg/Voel í toppslag deildarinnar næsta sunnudag.

*HALLDÓR J. Sigfússon og samherjar hans hjá þýska handknattleiksliðinu Tusem Essen unnu fjórtánda leikinn í sínum riðli 3. deildarinnar um helgina. Þá lögðu þeir TV Korschenbroich, 33:27. Halldór lét lítið fyrir sér fara við markaskorun, gerði aðeins eitt mark.

*DRÖFN Sæmundsdóttur tókst ekki að skora fyrir lið sitt FA Göppingen þegar það tapaði naumlega, 33:32, fyrir TSG Ober-Eschbach í suðurhluta þýsku 2. deildar kvenna í handknattleik á sunnudag. FA Göppingen er í 7. sæti af 15 liðum í deildinni með 12 stig að loknum 10 leikjum.

*STEFAN Kretzschmar leikur ekki með Magdeburg fyrr en eftir sex vikur eftir að hafa meiðst illa á hægri ökkla í upphafi leiks Magdeburg og Barcelona í meistaradeild Evrópu í handknattleik á sunnudag. Þetta þýðir að Kretzschmar leikur næst með liðinu í febrúar, að loknu hléi sem gert verður á þýsku deildakeppninni vegna Evrópumótsins í Sviss.

*BALDVIN Jón Hallgrímsson, knattspyrnumaður úr Val, er genginn til liðs við 1. deildarlið Þróttar. Baldvin, sem er 28 ára varnarmaður, lék með Val 2003 og 2004 en spilaði síðan sem lánsmaður með Völsungi í 1. deildinni síðasta sumar.

*KRISTÓFER Sigurgeirsson, knattspyrnumaðurinn reyndi sem lék með Fram síðasta sumar, er genginn til liðs við 1. deildarlið Fjölnis úr Grafarvogi. Kristófer er 33 ára og hefur leikið ýmsar stöður á vellinum, aðallega sem varnarmaður síðustu árin. Hann á að baki 196 deildaleiki með Fram og Breiðabliki, þar af 132 í efstu deild, og hefur spilað með Västra Frölunda í Svíþjóð og grísku liðunum Aris Saloniki og Ethnikos Pireus.