Sundbolir og tvískipt sundföt fyrir konur af öllum stærðum og gerðum.
Sundbolir og tvískipt sundföt fyrir konur af öllum stærðum og gerðum. — Morgunblaðið/Ásdís
[ Smellið til að sjá stærri mynd ]
"Ég áttaði mig á því að þörfin fyrir sundboli af þessari gerð var mjög mikil," segir Kristín Einarsdóttir, eigandi verslunarinnar Sigurbogans sem selur m.a. sundboli fyrir konur sem misst hafa annað brjóstið eða bæði.

"Ég áttaði mig á því að þörfin fyrir sundboli af þessari gerð var mjög mikil," segir Kristín Einarsdóttir, eigandi verslunarinnar Sigurbogans sem selur m.a. sundboli fyrir konur sem misst hafa annað brjóstið eða bæði. "Í merkinu sem ég hafði verið með frá árinu 2000 var mjög takmarkað úrval og þess vegna ákvað ég árið 2003 að byrja með þessa línu." Í línunni sem hún vísar til er hægt að fá sundboli fyrir konur af öllum stærðum og gerðum og konur sem af einhverjum ástæðum hafa misst annað brjóstið eða bæði geta fengið sundbol við sitt hæfi hjá Kristínu. "Það vantaði sundboli sem eru meira formandi, veita aðhald. Flotta boli fyrir konur sem þurfa stærri númer og stærri skálar."

Kristín hóf leitina að merki sem hentaði þessum konum og fann það hjá Anita. "Anita er þýskt merki og er mjög frægt fyrir undirfatnað og í því er líka framleitt ýmislegt fyrir konur sem hafa misst brjóst."

Lykilorðið er "grennandi"

Kristín segir að konur sjái fleira jákvætt við að geta fengið boli hjá henni. "Konum finnst gott að geta komið inn í svona venjulega búð til að versla. Að þurfa ekki að fara inn í sérverslanir til að kaupa sér svona fatnað." Að þessu sögðu grípur Kristín einn sundbolinn og sýnir blaðamanni. "Hér eru vasar í skálunum sem hægt er að setja gelbrjóst inn í." Annan bol grípur hún líka og heldur áfram. "Þessi er sérstyrktur, hann er tvöfaldur og formar líkamann, veitir mikið aðhald." Hún bendir jafnframt á að bolirnir séu ekki mjög hátt skornir. Hægt er að fá sundboli upp í stærðir 50-52. "Þennan verð ég að sýna þér," segir Kristín og er komin með enn eina gerðina. "Hann er númer 48 og er sérstyrktur, allur tvöfaldur, kallaður "súperformed". Hann er með sérsauma niður eftir maganum til að búa til mitti og forma líkamann. Þannig að hann lætur konurnar líta út fyrir að vera þremur kílóum léttari en þær eru. Viljum við ekki allar vera grannar?" segir Kristín hlæjandi og bætir við: "Lykilorðið er "grennandi"."

Kristín hefur verið í viðræðum við Tryggingastofnun um að konur sem fengið hafa brjóstakrabbamein fái styrk til að kaupa sundboli af þessari gerð, svipað og er með hárkollukaup og hefur fengið jákvæðan úrskurð. "Fyrir um tveimur árum fór Tryggingastofnun að taka þátt í kaupum á sundbol. Nú er nægjanlegt fyrir konu að koma með úrskurð frá TR í verslunina og festa kaup á sundbol. Verslunin innheimtir síðan kostnaðinn hjá Tryggingastofnun."

sia@mbl.is