— Morgunblaðið/Brynjar Gauti
ORKUGANGAN sem er skíðaganga fyrir almenning verður haldin laugardaginn 29. mars kl. 10 og hefst við Kröfluvirkjun í Mývatnssveit. Genginn verður 60 km hringur á Kröflusvæðinu og er þetta því lengsta skíðagangan hér á landi.
ORKUGANGAN sem er skíðaganga fyrir almenning verður haldin laugardaginn 29. mars kl. 10 og hefst við Kröfluvirkjun í Mývatnssveit. Genginn verður 60 km hringur á Kröflusvæðinu og er þetta því lengsta skíðagangan hér á landi. Mývetningur, íþrótta- og ungmennafélag, og björgunarsveitin Stefán eru framkvæmdaaðilar göngunnar.

Gengið verður að mestu um ósnortið land og verður leiðin troðin fyrir þátttakendur og lagt verður að minnsta kosti eitt spor alla leið. Drykkjarstöðvar verða með reglulegu millibili þar sem boðið verður upp á orkudrykki og súkkulaði. Allir fá svo súpu og brauð eftir að komið er í mark.

Þátttökugjald er 4.000 kr. og er innfalið í því aðgangur að Jarðböðunum við Mývatn eftir gönguna og lokahóf með léttum veitingum sem hefst kl. 18 í Hótel Reynihlíð þar sem veittar verða viðurkenningar og dregið verður nafn eins þátttakanda sem hlýtur utanlandsferð að eigin vali í vinning. Skíðasvæðið við Kröflu verður opið fram eftir degi en þar er togbraut og góð aðstaða til skíðaiðkunar. Nægt gistirými er í sveitinni og eru sumir ferðaþjónustuaðilar með „Orkugöngutilboð“ þar sem í boði er helgarpakki með gistingu og fæði á góðu verði, segir í fréttatilkynninu.

Allar nánari upplýsingar og skráning er hjá upplýsingamiðstöð staðarins í síma 464 4390 eða í netfangið orkuganga@visitmyvatn.is

Einnig má fræðast um gönguna á www.visitmyvatn.is/vidburdir