Alþingiskosningar 2009

Árni Haraldsson vill 2.-4. sæti fyrir VG

ÁRNI Haraldsson gefur kost á sér í 2.-4. sæti í forvali Vinstri grænna í Reykjavík sem fram fer 7. mars nk. Árni er 38 ára gamall og rafmagnsiðnfræðingur að mennt. Hann skráði sig í VG þann 1. febrúar sl. en hafði þar áður ekki verið flokksbundinn. Árni vill að opnað verði á umræður um Evrópumál og metið hvort fara skuli til viðræðna um inngöngu í ESB sem og myntsamstarf um evru.

Kolbrún sækist eftir endurkjöri

KOLBRÚN Halldórsdóttir alþingismaður gefur kost á sér í forvali Vinstri grænna í Reykjavík þann 7. mars nk. Í tilkynningu segist Kolbrún tilbúin að vera áfram í forustusveit flokksins og starfa að þeim málefnum sem flokkurinn stendur fyrir, þ.e. vernd náttúru og umhverfis, kvenfrelsi, jöfnuði og samábyrgð.

Þórdís gefur kost á sér í 6.-7. sæti

ÞÓRDÍS Kolbrún R. Gylfadóttir gefur kost á sér í 6.-7. sæti í prófkjöri Sjálfstæðisflokksins í Norðvesturkjördæmi sem fram fer þann 21. mars næstkomandi.

Þórdís Kolbrún er 21 árs gömul. Hún útskrifaðist frá Fjölbrautaskóla Vesturlands á Akranesi og stundar nú háskólanám.

Kristján Ketill sækist eftir 3.-5. sæti

KRISTJÁN Ketill Stefánsson gefur kost á sér í 3.-5. sæti í forvali Vinstri grænna í Reykjavík.

Kristján er með meistaragráðu í kennslufræði raungreina frá Háskólanum í Osló. Hann er nú aðjúnkt við menntavísindasvið HÍ og hefur tekið virkan þátt í flokksstarfi VG undanfarin ár.

Sveinn Halldórsson vill 2. sæti

SVEINN Halldórsson gefur kost á sér í 2. sæti á lista Framsóknarflokksins í SV-kjördæmi fyrir komandi alþingiskosningar.

Sveinn er húsasmíðameistari að mennt. Hann er formaður Framsóknarfélags Hafnarfjarðar og hefur tekið mikinn þátt í málefnavinnu flokksins, m.a. í tengslum við nýliðið flokksþing.

Hann telur að með stefnu Framsóknarflokksins sé hægt að tryggja siðbót í íslensku samfélagi.

Ingunn sækist eftir 4.-5. sæti fyrir VG

INGUNN Snædal gefur kost á sér í 4.-5. sæti í forvali Vinstri grænna í NA-kjördæmi sem fram fer 28. febrúar næstkomandi.

Ingunn er grunnskólakennari að mennt og er nú komin vel á veg með meistaranám í íslenskum fræðum við Háskóla Íslands. Hún hefur reynslu af ýmsum störfum, m.a. sveitastörfum, fiskvinnslu og þýðingum. Einnig hefur hún sinnt ýmsum þjónustu- og umönnunarstörfum.

Árni Björn sækist eftir 3. sæti

ÁRNI Björn Guðjónsson býður sig fram í 3. sæti í öðru hvoru Reykjavíkurkjördæminu fyrir VG í forvali flokksins. Árni fæddist 6. apríl 1939. Hann menntaði sig í smíðaiðn og myndlist og rak trésmiðju og síðar húsgagnaverslun í Reykjavík. Hann var í framboði fyrir Kristilega lýðræðisflokkinn í Reykjavík 1995 og 1999.

Brynja Björg sækist eftir 3.-4. sæti

BRYNJA Björg Halldórsdóttir gefur kost á sér í 3.-4. sæti í prófkjöri VG í Reykjavík. Hún er formaður UVG á höfuðborgarsvæðinu og leggur áherslu á kvenfrelsi, umhverfismál og málefni ungs fólks.