Víkverjiskrifar

Töluverð umræða hefur spunnist í kjölfar ummæla um dýrahald og smölun villikatta í meirihlutasamstarfi Samfylkingar og Vinstri grænna á Alþingi. Það kom því varla á óvart þegar Umferðarstofa sendi frá sér tilkynningu í fyrradag og varaði ökumenn við hundahaldi enda fyndist lögreglunni ástæða til þess að undirstrika hættuna sem því fylgdi.

Samkvæmt stjórnarliðum eru villidýr í þeirra hópi en Víkverji hefur hvorki séð boð né bönn við þeim. Hvers eiga hundar að gjalda, spyr hann eftir morgunhugvekju Umferðarstofu á miðvikudag. Þar segir að það sé furðu algengt að ökumenn aki með hunda í fanginu. Tekið sé fram í umferðarlögum að ökumenn eigi að vera með óskerta athygli við aksturinn og því megi segja að bannað sé að vera með hund í fanginu meðan á akstri stendur. „Dýrin skulu höfð í sérstökum öryggisbeltum eða búrum sem hvort tveggja má fá í gæludýrabúðum,“ segir Umferðarstofan og Víkverji tekur undir það. Upplögð jólagjöf fyrir ferfætlinga.

Annars er þetta eitt af því sem Víkverji á erfitt með að skilja. Þegar hallar á konur í umræðunni er oft sagt að þær hafi það fram yfir karla að geta gert margt í einu en þeir geti bara gert eitt í einu, ef það. Sé það rétt brjóta konur umferðarlögin frekar en karlar, að minnsta kosti lögin um akstur og dýrahald. Karlar geta ekki bæði ekið og haldið hund á sama tíma en konur fara létt með það.

Ekki er víst að konur vilji sitja undir því að brjóta lög og hvað þá í ríkari mæli en karlar. Því verður fróðlegt að fylgjast með umferðarmenningunni um jólin og sjá hverjir sitja undir hverjum.

Að svo mæltu óskar Víkverji lesendum gleðilegra jóla og vonar að allir eigi dýrlega hátíð. Líka þeir sem eru úti að aka.