Vísindamenn Verkfræðingar ásamt Kristínu Ingólfsdóttur háskólarektor þegar styrkurinn úr sjóðum Storr var afhendur.
Vísindamenn Verkfræðingar ásamt Kristínu Ingólfsdóttur háskólarektor þegar styrkurinn úr sjóðum Storr var afhendur.
Stjórn Menningar- og framfarasjóðs Ludvigs Storr hefur úthlutað styrkjum til sex einstaklinga og fimm verkefna. Styrkirnir nema samtals 20 milljónum króna.

Stjórn Menningar- og framfarasjóðs Ludvigs Storr hefur úthlutað styrkjum til sex einstaklinga og fimm verkefna. Styrkirnir nema samtals 20 milljónum króna. Sjóðurinn úthlutaði síðast styrkjum árið 2007 en í ár er úthlutunin sérlega vegleg í tilefni aldarafmælis Háskóla Íslands og þrjátíu ára afmælis sjóðsins.

Tilgangur sjóðsins er að stuðla að framförum á sviði jarðefnafræða, byggingariðnaðar og skipasmíða með því að styrkja vísindamenn á sviði jarðefnafræða, verkfræðinga, arkitekta, tæknifræðinga og iðnaðarmenn til framhaldsnáms. Styrkir eru einnig veittir til rannsókna á hagnýtum úrlausnarefnum í þessum greinum.

Styrkhafar í ár eru Aldís Sigfúsdóttir ráðgjafarverkfræðingur, Birgir Jónsson, dósent við Háskóla Íslands, Börge Johannes Wigum jarðverkfræðingur, Haukur Jörundur Eiríksson verkfræðingur og aðjunkt Háskóla Íslands, Ragnar Sigbjörnsson, prófessor við rannsóknamiðstöð í jarðskjálftaverkfræði, og Sigurður Erlingsson, prófessor við Háskóla Íslands.

Rannsóknir þessara vísindamanna eru hverjar á sínu sviði en tilgangurinn með styrkjunum til þeirra er að auka öryggi lagnakerfa og að jarðskjálftaskemmdir verði sem minnstar í framtíðinni, þróa og betrumbæta reikniaðferðir og tölvulíkön sem lýsa hegðun skerveggja og svo mætti áfram telja.

Menningar- og framfarsjóður Ludvigs Storr var stofnaður árið 1980 af Svövu Storr, seinni konu Ludvigs Storr, og einkadóttur hans frá fyrra hjónabandi, Önnu Dúfu Storr Pitt. Ludvig Storr var fæddur í Kaupmannahöfn 21. október 1897. Að loknu verslunarprófi starfaði hann í glerfyrirtæki foreldra sinna en árið 1922 settist hann að á Íslandi. Hann stofnaði byggingarvöruverslun Ludvigs Storr & Co. sem varð að Glerslípun og speglagerð hf. árið 1937 og var með umsvifamikinn rekstur hér á landi. Ludvig Storr lét til sín taka í félagsmálum og starfaði í ýmsum félagsskap Dana hér á Íslandi.