Bónað í 40 ár Bifreiðarnar hafa breyst, en aðferðin við að þvo og bóna bílana er enn sú sama.
Bónað í 40 ár Bifreiðarnar hafa breyst, en aðferðin við að þvo og bóna bílana er enn sú sama. — Morgunblaðið/Kristinn
Viðar Guðjónsson frettir@mbl.is „Við höfðum bara trú á þessu. Það er varla tilviljun að þetta hefur gengið í 40 ár,“ segir Ari Rafn Vilbergsson sem rekur Bón- og þvottastöðina á Grjóthálsi í Reykjavík ásamt föður sínum Vilberg Vilbergssyni.
Viðar Guðjónsson

frettir@mbl.is

„Við höfðum bara trú á þessu. Það er varla tilviljun að þetta hefur gengið í 40 ár,“ segir Ari Rafn Vilbergsson sem rekur Bón- og þvottastöðina á Grjóthálsi í Reykjavík ásamt föður sínum Vilberg Vilbergssyni.

Upphaflega hófst rekstur stöðvarinnar árið 1968 og var hún í Sóltúni til ársins 2006. Hún var þá sú fyrsta sinnar tegundar á Íslandi. Enn er notast við sömu aðferðir við þrif og upphaflegir eigendur viðhöfðu fyrir 40 árum.

Ari Rafn tók við rekstrinum ásamt vini sínum Andrési Jónssyni árið 2007. Þá hafði starfsemi Bón- og þvottastöðvarinnar legið niðri í um fimm mánuði. Til stóð að rífa húsið þar sem starfsemin hafði áður verið. Þær áætlanir gengu þó ekki eftir og í kjölfarið sáu þeir félagarnir tækifæri til þess að hefja rekstur að nýju. ,,Ég hef alltaf haft áhuga á bílum. Um leið og ég kom inn í þetta hús í Sóltúni sá ég að þetta var gott tækifæri. Það var að vísu svolítil vinna að koma húsinu í starfhæft ástand að nýju. En það gekk vel,“ segir Ari Rafn, spurður um reksturinn, en hann er með meistaragráðu frá tækni- og verkfræðideild Háskólans í Reykjavík.

Framkvæmdaglaðir feðgar

Feðgarnir Ari Rafn og Vilberg ákváðu að færa út kvíarnar á síðasta ári og hófu að reisa nýtt hús fyrir starfsemina við Grjótháls. Það hús var tekið í gagnið síðla árs 2011.

Að sögn Ara létu þeir erfitt efnahagsástand ekki draga úr sér kjark og voru sannfærðir um að eftirspurn væri eftir þessari starfsemi. Í húsinu er jafnframt Aðalskoðun sem sérhæfir sig í skoðun ökutækja. Ari segist ánægður með viðtökurnar þó að hann viðurkenni að erfitt tíðarfar hafi sett strik í reikninginn. Fáir hafi komið í kuldunum síðustu mánuði. Í febrúar hafi hins vegar annað verið upp á teningnum og viðskiptahópurinn stækkað ört.

Rótgróin starfsemi

Kjartan Sveinsson rak Bón- og þvottastöðina frá 1968 til 2006. Stöðin var sú fyrsta sinnar tegundar á Íslandi og stóð í Sóltúni þar til Íslenskir aðalverktakar hugðust rífa húsið og byggja þess í stað íbúðarhúsnæði. Þeim framkvæmdum var hins vegar frestað og stendur húsið þar enn.

Upphaflega hét hún Bílaþvottastöðin Bliki og var búin sjálfvirkum burstum. Þeir þóttu ekki gefa nægilega góða raun. Þess í stað var notast við handþvott og hefur það verið gert síðan.

BÍLAR FARA Í GEGNUM „HREINSUNARELDINN“

Þvoum þeim jafnvel á bak við eyrun

,,Meðan bíllinn þeirra fer í gegnum hreinsunareldinn horfa börnin spennt á þetta allt saman, og hafa aldrei kynnzt neinu furðulegra. Fyrir þeim er þetta hreinn undraheimur og meðfram færibandinu eru næg áhorfendastæði.“

Svona lýsir Kjartan Sveinsson, fyrrverandi eigandi, árdögum Bón- og þvottastöðvarinnar í viðtali við Morgunblaðið í nóvember árið 1969. Þvottastöðin naut hylli fleiri en yngstu kynslóðarinnar og jafnan gerði fólk sér ferð til þess að fylgjast með vélunum vinna.

Í greininni heitir Kjartan því að vandað sé til verksins undir fyrirsögninni: ,,Þvoum þeim jafnvel á bakvið eyrun.“

Stuttu síðar var hætt með hina áhorfendavænu vélknúnu bursta þar sem þeir þóttu fara illa með lakk bílanna. Handþvotturinn sem tók við þótti áhorfendum síður spennandi.