Franskur!Franck Ribery átti stóran þátt í sigri Bayern gamla liðinu sínu, Marseille.
Franskur!Franck Ribery átti stóran þátt í sigri Bayern gamla liðinu sínu, Marseille. — AP
[ Smellið til að sjá stærri mynd ]
Hvort er betra að liðið mitt „geti eitthvað“ eða að það sé að mestu skipað heimamönnum?

Óvenjulegt er að knattspyrnulið sé að mestu skipað heimamönnum nú til dags. Að minnsta kosti lið sem eitthvað er varið í að fylgjast með!

Þegar grannt er skoðað getur það meira að segja farið eftir því hvernig á málið er litið, hver telst heimamaður og hver ekki. En það er önnur saga.

Frægasta heimamanna-dæmi knattspyrnusögunnar er líklega þegar Celtic varð Evrópumeistari 1967, fyrst breskra félagsliða; þá voru allir leikmenn liðsins fæddir í borginni eða næsta nágrenni hennar.

Manchester United tefldi á tímabili fyrir fáeinum árum fram mörgum strákum, sem komu upp í aðalliðið úr unglingastarfinu; Neville bræðurnir, Gary og Phil, David Beckham, Paul Scholes, Ryan Giggs og Nicky Butt voru þar samtíða við frábæran orðstír. Liðið var óstöðvandi um tíma.

Fleiri dæmi mætti nefna en þau eru sjaldgæf, það nýjasta auðvitað besta lið heims í dag, Barcelona. Furðu margir snillinganna sem þar leika listir sínar komu í heiminn í borginni eða þar í grennd. Máttarstólpar þó fjarri eins og Alves hinn brasilíski og argentínska undrið Messi. Einhver kann þó að spyrja: Telst hann ekki heimamaður? Hann kom upp úr unglingastarfi félagsins! Það var vegna þess að Barcelona fékk fjölskylduna til að flytja frá Argentínu þegar strákurinn var liðlega tíu ára, af þeirri ástæðu hve mikið efni hann þótti. Velta má fyrir sér hugtakinu. Hve lengi þarf aðkomumaður að búa á Akureyri til að teljast heimamaður?

Stundum fullyrða áhugamenn um þennan skemmtilega boltaleik að þeir vilji helst af öllu sjá „sína“ menn skrýðast búningi eigin félags; stráka (eða stelpur) úr bæjarfélaginu og helst ekki einu sinni úr röðum annars liðs, þó innan bæjarmarkanna sé. En hvort er betra að horfa á „sína“ menn ef liðið getur aldrei neitt, eða að það sé skipað nokkrum gestum, í bland við heimamenn, og árangur náist? Að liðið vinni glæsta sigri og gleðji stuðningsmennina.

Því verður hver að svara fyrir sig.

Hætt er við því að stuðningsmenn Chelsea í London, svo dæmi sé tekið, væru til í slag við þann sem héldi því fram að John Terry og Frank Lampard væru ekki heimamenn. Hóf þó hvorugur ferilinn með Chelsea; fyrsta félag beggja var West Ham, en Terry fór reyndar til Chelsea 14 ára. Hvenær á að byrja að telja?

Lampard kom til Chelsea 17 ára en enginn kyssir merkið á treyjunni þó af meiri ástríðu en téður Frank.

Er Manuel Neuer, markvörður Bayern München og Þýskalands, heimamaður? Hann er frá Gelsenkirchen og hóf ferilinn hjá Schalke '04 og kom ekki til Bayern fyrr en á síðasta ári. Er þó að sjálfsögðu orðinn „okkar maður“ á vörum Bæverja. Ekki síður en einn þekktasti forveri hans, Oliver Kahn, sem var frá Karlsruhe.

Og þetta á ekki bara við um útlönd. Hve margir „uppaldir“ KR-ingar voru í meistaraliði síðasta árs? Hve margir „alvöru“ FH-ingar í FH-liðinu?

Skipti þetta einhverju máli?