Ástund Guðmundur ásamt foreldrunum Arnari Guðmundssyni og Sigríði Guðmundsdóttur sem stofnuðu Ástund. Fyrirtækið fagnar nú 40 ára afmæli.
Ástund Guðmundur ásamt foreldrunum Arnari Guðmundssyni og Sigríði Guðmundsdóttur sem stofnuðu Ástund. Fyrirtækið fagnar nú 40 ára afmæli.
Viðar Guðjónsson vidar@mbl.is Í dag eru 40 ár síðan hjónin Arnar Guðmundsson og Sigríður Guðmundsdóttir stofnuðu íþróttavöruverslunina Ástund.

Viðar Guðjónsson

vidar@mbl.is

Í dag eru 40 ár síðan hjónin Arnar Guðmundsson og Sigríður Guðmundsdóttir stofnuðu íþróttavöruverslunina Ástund.

Þótt fyrirtækið hafi í áranna rás selt hinar ýmsu íþróttavörur hefur það verið þekktast fyrir að bjóða vörur fyrir hestafólk. Raunar hefur Ástund hannað og selt vörur fyrir hestafólk frá árinu 1985 þegar fyrirtækið opnaði söðlaverkstæði.

Stendur fyrirtækið m.a. í hnakkaútflutningi og að sögn Guðmundar Arnarssonar, framkvæmdastjóra Ástundar, nær það ekki að anna allri eftirspurn. „Við sérhæfðum okkur strax í hestum. Í fyrstu var þetta líka bóka- og ritfangaverslun en varð síðar eingöngu íþróttavöruverslun. Stærsta vörumerki okkar er Ástund-hnakkarnir. Við flytjum út til allra Norðurlandaríkjanna, Hollands, Austurríkis, Sviss, Þýskalands, Nýja-Sjálands, Ástralíu og Bandaríkjanna,“ segir Guðmundur.

Ásamt hestafólki þekkir margt ballett-, dans- og fimleikafólk til Ástundar, þar sem alla jafna hefur verið úrval af fatnaði tengdi þessum íþróttum í boði.

Leita samstarfsaðila

Hann segir að erfitt sé að eiga í verðstríði við seljendur hnakka sem framleiddir eru í löndum á borð við Indland og Pólland og víðar. Þess í stað er mikið lagt upp úr gæðum hnakkanna. Að sögn Guðmundar eru flutt út hundruð hnakka ár hvert. „Um 70% af hnökkum okkar fara úr landi,“ segir Guðmundur. „Vandamálið okkar er það að allir hnakkar sem við framleiðum eru seldir. Við erum að reyna að finna samstarfsaðila hérlendis eða erlendis til að geta aukið framleiðsluna,“ segir Guðmundur.

Samningur við United

Á tímabili voru einnig seldar knattspyrnuvörur í Ástund og að sögn Guðmundar er fyrirtækið eina íslenska fyrirtækið sem gert hefur formlegan samning við Manchester United. Hann var undirritaður árið 2001 og hljóðaði upp á að Ástund sæi um sölu á félagsbúningum og öðrum varningi merktum félaginu. Í framhaldinu var opnuð Ástund Megastore. Hún varð þó ekki langlíf. „Við lögðum það niður fyrir nokkrum árum enda fara svo margir orðið til Manchester að sjá liðið spila og versla í leiðinni,“ segir Guðmundur.

Bjart yfir eftir mögur ár

Fyrirtækið hefur verið rekið með sömu kennitölu allt frá upphafi. „Framtíðin er björt. Það komu nokkur mögur ár í kreppunni en nú sjáum við fram á betri tíma og við vorum að búa til nýjan hnakk í tilefni af afmælinu. Hann er einn sá flottasti sem við höfum gert og er á tilboðsverði þessa dagana,“ segir Guðmundur.