Verslanir á sunnanverðum Vestfjörðum eru farnar að bjóða upp á margnota poka. Verkefnið er hluti af alþjóðlegu verkefni sem hefur verið nefnt Boomerang og gengur út á að minnka plastpokanotkun í heiminum.

Verslanir á sunnanverðum Vestfjörðum eru farnar að bjóða upp á margnota poka. Verkefnið er hluti af alþjóðlegu verkefni sem hefur verið nefnt Boomerang og gengur út á að minnka plastpokanotkun í heiminum. Nú geta viðskiptavinir fengið poka að láni í stað þess að kaupa plastpoka.

Margir eiga sína eigin poka og koma með þá að heiman og er mælt með því. Ef taupokinn gleymist heima er hægt að fá lánaðan taupoka í stað þess að kaupa plastpoka.

Boomerang er alþjóðlegt verkefni þannig að það má skila pokunum aftur hér á landi og erlendis á merktri Boomerang-pokastöð.

Lauslega er áætlað að þessar verslanir selji um 70.000 plastpoka á ári. Miðað við 500 heimili þá eru það 140 pokar á hvert heimili. Markmiðið er að sunnanverðir Vestfirðir verði plastpokalaust svæði.

500 pokar tilbúnir

Það er styrkur hópur sem stendur að þessu verkefni og hefur útbúið pokana úr efni sem er fáanlegt á svæðinu, á Patreksfirði, Tálknafirði og Bíldudal. Búið er að útbúa rúmlega 500 poka og það verður síðan að koma í ljós hversu marga þarf í viðbót.

Hóparnir hittast áfram til þess að sauma poka ef vantar. Þeir hafa hist í Húsinu á Patreksfirði, Vindheimum á Tálknafirði og Læk á Bíldudal.