Ingimar Sveinsson fæddist á Hálsi í Hamarsfirði 19. júní 1927. Hann lést 29. maí 2020.
Foreldrar hans voru Sveinn Stefánsson bóndi á Hálsi og Kristín Sigríður Stefánsdóttir. Systir hans var Aðalborg Sveinsdóttir og lést hún árið 1978. Eiginkona Ingimars er Erla Ingimundardóttir og eiga þau tvo syni, Sigurð Inga og Svein Kristján. Ingimar og Erla eiga átta barnabörn og þrjú barnabarnabörn.
Ingimar stundaði nám við Kennaraskólann í Reykjavík og lauk þaðan prófi 1952. Hann kenndi í þrjá vetur á Ólafsfirði og gerðist svo skólastjóri við Grunnskóla Djúpavogs. Hann starfaði sem skólastjóri í 30 ár og kenndi síðan í 10 ár við skólann, með eins árs starfsleyfi þar sem hann var við nám í Kennaraháskóla Kaupmannahafnar árið 1969-70. Hann gegndi fjölmörgum trúnaðarstörfum fyrir hin ýmsu félagasamtök. Ingimar dvaldi síðustu fjögur ár ævi sinnar á Dvalar- og hjúkrunarheimilinu Uppsölum á Fáskrúðsfirði.
Útför Ingimars fer fram frá Djúpavogskirkju í dag, 6. júní 2020, klukkan 14.
Það er dýrmætt fyrir lítil samfélög, þar sem sagan liggur við hvert
fótmál, að hafa á að skipa fólki sem hefur færni til að miðla fróðleik um
liðna tíma svo að þeir sem eftir standa og erfa munu landið verði betur
meðvitaðir um nærumhverfi sitt.
Nú er fallinn frá maður sem hafði allt þetta til að bera, fróðleiksbrunnur
og einstakur persónuleiki sem skildi mikilvægi þess að deila heimildum um
horfna tíma til komandi kynslóða.
Mér finnst í raun eins og að ég hafi þekkt Ingimar Sveinsson alla tíð. Það
skýrist líkast til af því hve vel hann sagði frá, m.a. uppvexti sínum,
staðháttum og mannlífi á árum áður. Ingimar var alltaf til í spjall og
ósjaldan leitaði ég til hans þegar á þurfti að halda og þá helst þegar
vantaði heimildir um hvaðeina sem hafði með sögu svæðisins að gera og
alltaf kvaddi maður einhvers vísari. Það voru margir sem leituðu einmitt
til Ingimars þegar afla þurfti heimilda um svæðið. Ég var því aldeilis ekki
einn um það. Ingimar gaf því meira af sér í þessum efnum en aðrir þeir sem
ég hef kynnst um ævina. Mér varð svo sífellt ljósara eftir því sem árin
liðu hvað honum var það mikið hjartans mál að rétt væri farið með og sagan
kæmist áfram til skila.
Oftar en ekki lá leið okkar um gamla Hálsþorpið sem er steinsnar frá
Djúpavogi. Var þá stundum áð við Hálskirkjugarð og þá gjarnan horft upp á
túnið ofan við garðinn þar sem bernskustöðvar hans að Hálsi höfðu staðið og
glaðlegt blik í augum bættist við frásögnina. Þarna voru rætur hans og æska
og þar leituðu minningarnar á hann við hvert fótmál. Þeim minningum kunni
hann öðrum fremur að deila. Staðhætti og mannlíf í Hálsþorpi bar því oft á
góma í ferðum okkar og líkast til var honum enginn staður hugstæðari en
einmitt þar sem við stóðum og horfðum yfir Hálsa og Hálsarætur.
Það hefur án vafa verið einstakt að alast upp í þessu fallega umhverfi, með
Hultrana og Hálsfjallið yfir sér, lækjarseytlur og reisulega bergganga og
strýtur í nágrenni til að klifra í. Útsýnið frá Hálsi er fallegt yfir
Hamarsfjörðinn og því var það varla tilviljun að Ingimar og Erla byggðu
heimili sitt í góðu skjóli undir Borgarhól úti á Djúpavogi þar sem útsýnið
blasir við yfir hluta Hamarsfjarðar. Stundum tókum við auka sögurúnt lengra
inn í Hamarsfjörðinn. Þá var oft staldrað við Djáknadys og tæru lindina
Vígðalæk og svo á Krossfletinum og fleiri merkum stöðum sem bera söguna með
sér.
Ingimar var líka vel lesinn um Djúpavog og nágrenni allt aftur til landnáms
og miðlaði þeim fróðleik með öðru. Hann var sömuleiðis vel ritfær og þá
hæfileika nýtti hann meðal annars með því að gefa út tvær bækur sem líkast
til eru til á hverju heimili í Djúpavogshreppi, en það eru bækurnar 400 ár
við voginn og Siglt og róið.
Í þessum bókum eru sögu Djúpavogs og nágrennis gerð hnitmiðuð og góð skil.
Bækur þessar hafa sannarlega reynst mikill fengur, ekki síst þegar leita
hefur þurft heimilda. Um langt árabil voru þær vinsælasta gjöf
sveitarfélagsins og eru líkast til enn í dag, t.d. við opinberar heimsóknir
ráðamanna og annarra góðra gesta.
Ég tel mig geta staðhæft að fáir eða engir hafi til þessa lagt jafn mikið
og heildstætt af mörkum til að viðhalda menningararfi Djúpavogs og Ingimar
Sveinsson. Það er gríðarlega dýrmætt fyrir samfélagið á svæðinu um ókomna
tíð. Ingimar hefur efalaust að einhverju marki notið þess sem fyrrverandi
kennari og skólastjóri á Djúpavogi að eiga auðvelt með að miðla fróðleik
sem hann hélt svo áfram eftir að starfi hans við Djúpavogsskóla lauk.
Einnig hafði hann þá náðargáfu sem er ekki öllum gefin og felst í lifandi
frásagnarstíl sem fær fólk til að leggja við hlustir. Og ekki skemmdi fyrir
að Ingimar bjó yfir góðum orðaforða og hafði góð tök á íslensku máli. Og
alltaf var stutt í glettnina þegar við átti.
Ingimar tók oftar en ekki að sér leiðsögn um svæðið þegar gesti bar að
garði og þá var leitað til hans. Talið bara við Ingimar, hann er með þetta
á hreinu var oftar en ekki viðkvæðið. Þá gilti einu hvort farið var með
ferjunni út í Papey eða um Djúpavog og nágrenni. Um langt árabil var því
oftar leitað til Ingimars en annarra þegar menn vildu fræðast um eitthvað
tengt svæðinu. Og án þess að ég hafi um það spurt þá leyfi ég mér að efast
um að hann hafi nokkru sinni neitað þegar leitað var til hans því að alltaf
gaf hann sér tíma og var í raun þakklátur fyrir að fá að miðla endalaust úr
fróðleiksbrunni sínum.
Þekking og áhugasvið Ingimars lá víðar því að náttúran og lífríkið allt var
honum hugleikið rétt eins og sagan. Ingimar sá meðal annars um
vetrarfuglatalningar fyrir Náttúrufræðistofnun um langt árabil á gömlu
heimaslóðunum inn með Hamarsfirði og þegar hann tók að reskjast þá gengum
við í lið með honum, undirritaður og Kristján sonur hans. Þessar
fuglatalningarferðar voru í raun ómissandi þáttur í tilveru okkar um árabil
og ekki laust við að það væri spenningur kringum hver áramót þegar viðraði
til talningar. Spurningar vöknuðu í upphafi ferða: Myndum við sjá eitthvað
af himbrima, fjöruspóa og kannski hvinandarparið, eða þá stelkinn sem hélt
sig alltaf við kaldavermsllækinn í Henglavíkinni? Þessar
fuglatalningarferðir þykir mér óskaplega vænt um að hafa átt með þeim
feðgum. Svo bárum við gjarnan saman bækur okkar, hvort hefði verið meira
eða minna af þessari eða hinni fuglategundinni frá því í fyrra og svo
fletti Ingimar líka upp í áratuga gömlum talningabókum. Jú, sannarlega hafa
orðið marktækar breytingar á fuglalífi á svæðinu á þessum tíma.
Ingimar var líka mikill dýravinur og var um árabil með nokkrar kindur
sér til gamans. Þá var spjallið gjarnan tekið við fjárkofann í Löngulág
þegar gefið var á garðann.
Það var mikil gestrisni og einstaklega gott að koma á heimili þeirra góðu
hjóna Ingimars og Erlu á Borgarhóli. Þá var spjallað um heima og geima.
Meðal annars ræddi Ingimar nokkuð oft við mig að gaman væri koma því í
kring að Miðmorgunsþúfan yrði hlaðin upp aftur á pari við það sem hún hefði
verið þegar hann mundi fyrst eftir. Þarna uppi á stóra bergganginum hafði
verið áberandi þúst og öllu hærri og veglegri en stærstu fuglaþúfur.
Kannski mun þessi veglega þúst á hamrinum verða hlaðin að nýju einhvern
daginn eftir heimildum frá Ingimar.
Síðustu árin þegar heilsunni hrakaði og Ingimar þurfti að dveljast fjarri
heimili sínu heyrðumst við nokkuð reglulega í síma. Þá bar ferðir fuglanna
ætíð á góma og svo var eins um síðasta símtalið sem við áttum fyrir ekki
svo löngu. Þá var meðal annars rætt um afkomu ýmissa fuglategunda og áleit
Ingimar að lóunni væri að fækka frá því hann mundi fyrst eftir.
Nú hefur Ingimar Sveinsson, minn góði félagi og vinur sem hafði svo mikið
að gefa, kvatt heimaslóðirnar sínar kæru. Hann verður um ókomna tíð
órjúfanlegur hluti af þeim bestu minningum sem ég mun geyma með mér frá
Djúpavogi.
Nú hnígur sól
Nú hnígur sól að sævarbarmi,
sígur húm á þreytta jörð.
Nú blikar dögg á blómahvarmi,
blundar þögul fuglahjörð.
Í hljóðrar nætur ástarörmum
allir fá hvíld frá dagsins hörmum.
(Axel Guðmundsson)
Við Gréta vottum Erlu, Sigurði og Kristjáni og fjölskyldum þeirra innilega
samúð.
Andrés Skúlason.