"FULLKOMNASTA og fjölbreyttasta frí, sem völ er á, vinsælustu skemmtisiglingar heimsins", auglýsir CARNIVAL skipafélagið, og virðist standa við það, eftir vinsældum þess að dæma. Margt bendir til að Carnival hafi tryggt sér yfirburðastöðu í skemmtisiglingum heimsins með glæsilegum skipaflota sínum í Karíbahafi, sem stækkar ár frá ári.
Stærsta skemmtisiglingaskip heims Á vit örlaganna

Glæsiskipið Destiny, sem hleypt verður af stokkunum í nóvember næstkomandi, verður stærsta og glæsilegasta skemmtiferðaskip sem siglt hefur á heimshöfunum. Sveinn Guðjónsson kynnti sé innviði skipsins og umsvif Carnival skipafélagsins, sem gerir skipið út.

"FULLKOMNASTA og fjölbreyttasta frí, sem völ er á, vinsælustu skemmtisiglingar heimsins", auglýsir CARNIVAL skipafélagið, og virðist standa við það, eftir vinsældum þess að dæma. Margt bendir til að Carnival hafi tryggt sér yfirburðastöðu í skemmtisiglingum heimsins með glæsilegum skipaflota sínum í Karíbahafi, sem stækkar ár frá ári.

Carnival skipafélagið rekur nú tólf glæsilega búin lúxusskip, sem flest láta úr höfn í Miami eða San Juan á Puerto Rico vikulega og sigla mismunandi leiðir milli eyja í Karíbahafi, en auk þess eru í boði lengri siglingar, 11-16 daga gegnum Panamaskurðinn norður með strönd Mið-Ameríku til Los Angeles, viku Alaskasiglingar frá Vancouver á sumrin, og 11 daga siglingar frá Vancouver til Hawaii eyja.

Ljósasta dæmið um vöxt og viðgang Carnival skipafélagsins er hin mikla aukning skipaflotans, tvö ný risaskip á ári síðustu ár. INSPIRITION, rúm 70 þúsund tonn, hóf siglingar í lok apríl, en stærsta skipinu verður hleypt af stokkunum innan skamms og hefur siglingar í byrjun nóvember. Það hefur hlotið nafnið DESTINY og verður stærsta skemmtiferðaskip heimsins, 101 þúsund tonn, eða nærri þriðjungi stærra en Queen Elisabeth II. frá Cunard, sem kom við í Reykjavík á dögunum.

Flaggskip skemmtiskipaflotans

Destiny - "Örlögin"- verður afar glæsilega búið og flaggskip skemmtiskipaflotans með fullkominni aðstöðu bæði til hvíldar, slökunar og endurhæfingar, svo sem fjórum sundlaugum, sjö nuddpottum, skokkbrautum, líkamsræktarstöð, nudd-, snyrti- og hárgreiðslustofum. Tónlist af öllu tagi verður í boði, bæði klassísk dinnertónlist, jazz og latnesk, afrísk-amerísk tónlist Karíbahafsins með sitt eggjandi hljóðfall, kvikmyndasalur, stærsta kasínó á hafi úti, píanóbarir, danssalur og tollfrjálsar verslanir. Næturklúbburinn Palladium með fullkomnum leiksviðsbúnaði, þar sem þrjár hæðir eru til lofts, er glæsilegt leikhús, þar sem fjölþjóða skemmtikraftar koma fram á sýningum í Las Vegas stíl.

Í miðju skipsins er aðalsetustofan, Rotunda, atríumbyggð, þ.e. opin upp í gegnum níu þilför skipsins, glæsilega innréttuð með glerhjúp efst, svo að dagsbirtan kemst inn, en á kvöldin geta gestir horft á stjörnur himins og jarðar úr sætum sínum. Þrír stórir veislusalir eru um borð og veitingar ekki af verri endanum, matseld í höndum færustu matreiðslumeistara, og fullt fæði innifalið með allt að fimm máltíðum á dag.

Siglingar í tísku

Vinsældir skemmtisiglinga fara sívaxandi, eins og sjá má af umsvifum Carnival skipafélagsins. Fleiri og fleiri líta svo á að með góðri skemmtisiglingu rætist draumurinn um fullkomið frí við bestu aðstæður, þar sem allt er innan seilingar, þar sem gististaðurinn færist um set með gestinum og aldrei þarf að pakka niður, fyrr en farið er frá borði. Karíbahafið er langvinsælasta svæði fyrir skemmtisiglingar í heiminum, en því veldur bæði gott loftslag og fjölbreytt mannlíf á fögrum eyjum. Verðið á skemmtisiglingum hefur líka lækkað verulega frá því sem áður var, svo að nú geta fleiri en áður látið slíkan draum rætast.

Heimsklúbbur Ingólfs og ferðaskrifstofan hans, Príma, fara með umboð á Íslandi fyrir Carnival skipafélagið frá árinu 1994. Að sögn Ingólfs Guðbrandssonar forstjóra er stöðug aukning í sölu með skipum Carnival, og nú um mitt ár var farþegafjöldinn orðinn tvöfaldur frá síðasta ári. "Siglingar eru í tísku í heiminum í dag," segir Ingólfur. "Fólk er komið á bragðið. Margar pantanir hafa nú þegar borizt fyrir næsta ár, t.d. stór hópur, sem vill sigla með Destiny um mitt næsta ár. Hin frábæru kjör, sem okkur hefur tekizt að útvega, hafa líka ýtt undir og kynnt þennan ferðamáta, þar sem um allt að helmings afslátt hefur verið að ræða á siglingunni, og svo njótum við líka sérfargjalda á flugfargjöldum, sem einnig sparar farþeganum útgjöld. Nú vita margir af reynslunni, hvað lífið um borð er skemmtilegt og möguleikarnir óþrjótandi að njóta lífsins."

Fjörið og gleðin ráða ríkjum

Til skamms tíma hefur sú skoðun verið ríkjandi að skemmtisiglingar væru aðeins fyrir aldrað, ríkt fólk og lífið um borð væri eins og á elliheimili. En því fer fjarri á skipum Carnival, þar sem fjörið og gleðin ráða ríkjum. Markaðskannanir í Bandaríkjunum staðfesta líka að ungt fólk sækir í síauknum mæli í skemmtisiglingar Carnival skipafélagsins, enda eru skipin sérstaklega smíðuð með afþreyingu og skemmtanalíf í huga, svo sem fjörugt næturlífið um borð ber vott um. Hins vegar getur fólk jafnframt notið kyrrðar og hvíldar og ekki síst útivistar við einstök skilyrði.

Í samanburði við dvöl á lúxushótelum og fæði á góðum matsölustöðum eru siglingar Carnival ódýrar, eða allt frá 100 dollurum að meðaltali á dag með öllu inniföldu nema drykkjum, eða svipað og góð máltíð á bestu veitingastöðum á Íslandi.

Að sögn Ingólfs Guðbrandssonar er algengt að fólk lengi dvöl sína og bæti til dæmis viku við eftir siglingu, annað hvort í Flórída eða á eynni Dóminíkana í Karíbahafi, sem er undurfögur, og verðlag þar er sérlega hagstætt, dvöl á góðum gististað með öllu inniföldu, mat, drykkjum og skemmtun fyrir um 50 dollara á dag.

Heimahöfn Destiny verður Miami, og þaðan mun skipið sigla vikulega frá nóvemberbyrjun, til skiptis eystri og vestari siglingaleið um Karíbahafið. skipið er um 300 metrar að lengd, farþegaþilför eru níu, rúm fyrir 2642 farþega um borð og í áhöfninni eru 1000 manns. Læknar og hjúkrunarlið eru um borð og sjúkrastofa, ef eitthvað skyldi bera útaf með heilsu farþega, og allur öryggisútbúnaður er eftir ströngustu reglum. Vafalaust mun marga Íslendinga fýsa að taka sér far með þessum glæsilega farkosti.



KORT af siglingaleiðum Destiny á Karíbahafi.

MIKIÐ er lagt upp úr glæsilegum kvöldmáltíðum og hér er teikning af Universe-matsalnum, einum af þremur stórum veislusölum skipsins.

PENTHOUSE-svítan á efsta þilfari.

FJÖRUGT næturlíf er einkennandi fyrir siglingarnar. Sumir fá sér snúning, aðrir bregða sér í spilavítið.