JÓN JÓNSSON

Jón Jónsson var fæddur á Tannstaðabakka í Hrútafirði 24. febrúar 1920. Hann lést á gjörgæsludeild Landspítalans 13. júlí síðastliðinn. Foreldrar hans voru Jón Einarsson á Tannstaðabakka og eiginkona hans Jóhanna Þórdís Jónsdóttir frá Hróðnýjarstöðum í Laxárdal. Jón var næstyngstur af sjö börnum þeirra hjóna. Systkini hans voru: 1) Guðrún, lést ung. 2) Guðlaug Dahlmann, lengi á Ísafirði, vann síðast hjá Ritsímanum í Reykjavík. 3) Svanborg, lést ung. 4) Herdís, á Hraunsnefi í Norðurárdal, síðan starfsstúlka í Reykjavík. 5) Einar, bóndi á Tannstaðabakka. 6) Guðrún, átti Karl Bigseth í Álasundi í Noregi. Guðlaug og Guðrún yngri létust báðar 1993, en Herdís og Einar lifa bróður sinn. Árið 1958 kvæntist Jón Láru Pálsdóttur, f. 31. ágúst 1933, d. 31. ágúst 1993. Lára var dóttir hjónanna Páls Theodórssonar og Vinbjargar Ástu Albertsdóttur á Sveðjustöðum í Miðfirði. Jón og Lára eignuðust sex börn: 1) Jóhanna Svanborg, f. 22.4. 1959, d. 1.3. 1960. 2) Jóhanna Svanborg, f. 12.5. 1961, sjúkraliði í Vestmannaeyjum, gift Sigurði Franz Þráinssyni. 3) Jón Bjarni, f. 31.7. 1962, verktaki í Reykjavík, kvæntur Jóhönnu Jóhannesdóttur. 4) Albert Jónsson, f. 13.1. 1964, bóndi Eyjanesi. 5) Guðrún, f. 1.4. 1967, félagsráðgjafi í Vestmannaeyjum, gift Hreggviði Ágústssyni. 6) Þorgeir, f. 23.6. 1973, verkamaður í Eyjanesi. Lára átti fyrir tvö börn; Þröst Guðlaugsson, f. 26.3. 1955, bakara á Akranesi, og Vinbjörgu Ástu Guðlaugsdóttur, f. 30.12. 1956, gift Jóni Einarssyni á Blönduósi. Barnabörnin eru orðin á annan tug. Jón stundaði nám í Reykjaskóla tvo vetur. Hann vann á búi foreldra sinna, stundaði félagsbúskap með Einari bróður sínum á Tannstaðabakka þar til jörðinni var skipt og Jón og Lára stofna nýbýlið Eyjanes 1959. Þau reistu þar öll hús og ræktuðu landið. Jón og Lára bjuggu í Eyjanesi þar til 1991, er þau fluttu á Hvammstanga. Jón var virkur í félagsmálum, sat m.a. um árabil í hreppsnefnd. Útför Jóns fer fram frá Staðarkirkju í Hrútafirði í dag og hefst athöfnin klukkan 14.