Lokun hjá ríkissjónvarpinu, gott mál

Lokun hjá ríkissjónvarpinu, gott mál

ÁSTÆÐA fyrir skrifum mínum er vegna fréttar Stöðvar 2 í gær sunnudag vegna lokunaraðgerða Heimdallar á ríkissjónvarpið. Ég sá þessar auglýsingar Heimdallar í skólanum mínum og vöktu þær athygli samnemenda minna. Þessi aðferð þeirra til að sýna fram á það óréttlæti sem ríkissjónvarpið hefur komist upp með í gengum árin, var skemmtilega úr garði gerð og vakti athygli mína. Mig langar til að lýsa yfir fullum stuðningi við Heimdall ásamt því að kasta fram þeirri spurningu hvort einhver hafi athugað þann kost að fara í mál við ríkissjónvarpið fyrir hönd allra Íslendinga. Svona óþolandi óréttlæti á að hindra nú þegar og ég skora á alla Íslendinga að ígrunda þann möguleika alvarlega.

Ég segi bara "Áfram Heimdallur!"

Stuðningsmaður.

Villandi gagnrýni

ER HÆGT að segja mjög lagvissan mann laglausan? Auðvitað ekki. Skissa er fyrst og fremst mynd sem er rissuð upp og ekki útfærð. Engin slík skissa er á sýningu Sigurðar Eyþórssonar í Gallerý Fold sem nú stendur yfir, eins og Jón Proppé vill vera láta í gagnrýni sinni í Morgunblaðinu í dag, miðvikudaginn 13. október. Er hann ólærður í myndlist? Veit Jón Proppé ekki hvað myndbygging er? "...í þeim virðist ekki farið af stað með neina ákveðna heildarhugmynd og myndbygging hefur stundum greinilega ekki verið vel ákveðin fyrirfram." Það skýtur nokkuð skökku við hjá Jóni að ýja að flaustri vegna þess að notkun Sigurðar á myndbyggingu og rými í mynd er fyrsta flokks, áberandi vel ígrunduð og allt út í gullinsnið, fyrir þá sem vita hvað það er. Er gagnrýni Morgunblaðsins til þess gerð að gefa villandi upplýsingar?

Ingibjörg Elín

Sigurbjörnsdóttir.

Göngustígur við Bláa lónið ÍRIS hafði samband við Velvakanda og vildi benda á að göngustígurinn við Bláa lónið væri helst til langur. Hún og maki hennar, ásamt öðrum hjónum, höfðu farið þangað á mánudaginn til þess að fá sér kaffisopa og væru þau öryrkjar og ættu erfitt um gang. Þeim fannst erfitt að ganga þennan spotta. Fyrirspurn til RÚV

HVAÐ meina forsvarsmenn RÚV með því að flytja leikrit um valdarán á Íslandi á samtengdum rásum 1 og 2 sl. laugardag. Fannst mér þetta leikrit ekkert sniðugt og vil ég fá skýringu á því hvað þeim hafi gengið til að flytja það. Var mér sagt að mikið hefði verið hringt frá elliheimilum því að þar hafi fólk orðið mjög hrætt er það hlustaði á útvarpið. Finnst mér þetta fyrir neðan allar hellur og mjög óviðeigandi og vil ég fá skýringar á þessu.

Áslaug Kjartansdóttir.

Tapað/fundið

Stór svört taska týndist

STÓR svört taska týndist úr bíl annaðhvort í Karfavogi eða á Sogavegi í byrjun vikunnar. Í töskunni voru kennslugögn sem nýtast engum nema eiganda og er gagnanna sárt saknað. Skilvís finnandi hafi samband við Ragnheiði í síma 554 1400, 698 5218 eða 553 7578. Fundarlaun.

Íkornastytta týndist

ÍKORNASTYTTA týndist frá Torfufelli 36 sl. sumar. Þeir sem kannast við að hafa styttuna undir höndum eru beðnir að skila henni aftur á sama stað.

Gullhálsmen týndist

GULLHÁLSMEN með blóðsteini týndist helgina 8.­10. október. Skilvís finnandi hafi samband í síma 587 8744.

Dýrahald

Svartur kettlingur í óskilum

SVARTUR stálpaður kettlingur, ómerktur og ólarlaus, er í óskilum í Úthlíð í Reykjavík. Þeir sem kannast við kettlinginn vinsamlega hafið samband í síma 552 7031 eða vs. 515 3900 eða 896 3764.

Læða týndist í Garðabæ

GRÁBRÖNDÓTT læða týndist frá Furulundi 4, Garðabæ, aðfaranótt mánudagsins sl. Hún er merkt og á að vera með ól. Þeir sem hafa orðið hennar varir hafi samband í síma 565 7524.