[ Smellið til að sjá stærri mynd ]
Hún mun seint hverfa úr minni þeirra sem sáu viðureign Menntaskólans í Reykjavík og Borgarholtsskólans í úrslitum Gettu betur. Ásgeir Ingvarsson var á staðnum og ræddi við tvö sigurlið.

ÓHÆTT er að fullyrða að aldrei fyrr í sögu Gettu betur hafi sést önnur eins viðureign og sú sem fór fram á föstudagskvöldið. Víst er að þessi magnþrungna keppni mun seint gleymast, enda fylgdust án vafa velflestir landsmenn með þessari keppni, þar sem Menntaskólinn hafði Borgarholtsskóla naumlega undir í æsispennandi bráðabana og vann þar með hljóðnemann 9. árið í röð.

Lið skólanna voru skipuð einvalaliði manna: lið Menntaskólans í Reykjavík þeim Sverri Teitssyni, Hjalta Snæ Ægissyni og Svani Péturssyni, en lið Borgarholtsskóla skipuðu Sæmundur Ari Halldórsson, Páll Theódórs og Hilmar Már Gunnarsson.

Pabbi úti í bílskúr

"Þetta var alveg rosalegt," sagði Sæmundur úr Borgarholti, aðspurður um líðanina eftir keppnina. "Ég vona bara að við höfum valdið mikilli spennu á heimilum landsmanna. Ég veit að pabbi minn hefur líklega verið úti í bílskúr alla útsendinguna því hann hefur ekki þorað að horfa. Ég held reyndar að það sé óhætt að fullyrða að þetta hafi verið mest spennandi keppni Gettu betur frá upphafi."

Andinn innan liðsins var að sögn Sæmundar sterkur: "Það komu tímabil þar sem við duttum niður, en við börðum hver annan áfram, og einhvern veginn tókst þetta. Ég vissi að við þyrftum að hafa heppnina með okkur ef við ætluðum að velta MR úr sessi, en það má einmitt segja að við höfum verið mjög heppnir. Það var 6 stiga munur þegar tvær spurningar voru eftir og ég átti ekki von á því að í lok keppninnar yrði jafnt," sagði Sæmundur, en liði Borgarholtsskóla tókst á frækilegan hátt að svara tveimur síðustu spurningunum, og náði þannig að jafna stöðuna og knýja fram bráðabana.

Óskandi að skipta hljóðnemanum

Þeir Hjalti, Svanur og Sverrir í liði MR voru sammála um að í raun stæðu bæði lið uppi sem sigurvegarar: "Okkur finnst að þetta hafi í raun verið jafntefli og tilviljun ein hafi ráðið því hvort liðið sigraði. Raunin varð að það urðum við, en það hefði allt eins getað verið Borgarholt. Þeir stóðu sig feikilega vel í þessari keppni og hefðu alveg átt skilið að vinna," sagði Sverrir Teitsson. "Við hefðum þó getað gert ýmislegt betur, og erum ekki fyllilega sáttir við okkar frammistöðu, en það breytir engu um það að frammistaða Borghyltinganna var frábær. Það væri bara óskandi að hægt væri að skipta hljóðnemanum í tvennt."

Logi Bergmann Eiðsson, spyrill keppninnar til þriggja ára, sagðist sjálfur aldrei hafa lent í öðru eins, enda sátu allir í salnum á sætisbrúnunum þegar síðustu spurningarnar voru bornar upp og eitt rétt svar gat úrskurðað um sigur. "Þessi keppni er það skemmtilegasta sem maður getur komist í," sagði Logi, "og sérstaklega kvöld eins og í kvöld, þegar 1.200 manns eru í salnum og það er þvílík dauðaþögn að heyra mætti saumnál detta."

"Ég verð að játa það að ég var búinn að sætta mig á tímabili við að tapa," sagði Svanur spurður um líðanina síðustu mínútur keppninnar. Sverrir tekur í sama streng: "Ég verð að játa það líka að um tíma, þá sérstaklega þegar Borghyltingar voru einu stigi yfir og við biðum eftir niðurskurði um vissa spurningu um hnefaleikakappa, þá hélt ég að þeir hjá Borgarholtsliðinu hefðu svarað rétt, og það fór engin einasta tilfinning um líkama minn og ég var búinn að sætta mig við þetta. Ég og Svanur vorum á tímabili að bugast en Hjalti hvatti okkur áfram."

"Við bjuggumst við að vera búnir að sigra þegar Borgarholtsskóli svaraði skyndilega rétt tveimur þriggja stiga spurningum. Ég verð að játa að við vorum einnig ansi svekktir þegar eitt stig var tekið af okkur," segir Sverrir, en MR fékk fyrir slysni einu stigi of mikið fyrir vísbendingaspurningarnar, en það var síðan lagfært þegar skammt var eftir af keppninni.

Sex sigurvegarar

Strákarnir sögðust ætla að halda ærlega upp á sigurinn: "Við erum að fara heim til mín," sagði Hjalti, "þar sem við ætlum að syngja og dansa fram á rauða nótt, í góðra vina hópi því allir ætla að koma: Borghyltingarnir, dómari, stigavörður og spyrill."

Og með þessum orðum voru þeir þotnir, í löngu verðskuldaðan fögnuð, 6 fræknir piltar: Sæmundur, Páll og Hilmar og Sverrir, Hjalti og Svanur, sem allir eru í dag hetjur, hver í sínum skóla, og eru sannarlega allir með tölu sigurvegarar kvöldsins.