Sigrún Bjarnadóttir

Sigrún Bjarnadóttir fæddist í Landsveit 15. júní 1944. Hún lést á Landspítalanum við Hringbraut 22. október síðastliðinn. Foreldrar hennar voru Bjarni Jóhannsson, bóndi á Árbakka, f. 16. september 1908, d. 2. febrúar 2002, og Elínborg Sigurðardóttir bóndi, f. 20. maí 1909, d. 19. desember 2003. Systkini Sigrúnar eru Guðríður, f. 4. mars 1934, Jóhanna Helga, f. 23. maí 1939, d. 25. febrúar 1941, Jóhann, f. 18. apríl 1942, og Pálmi, f. 26. nóvember 1949.

Hinn 1. júní 1968 giftist Sigrún Val Haraldssyni deildarstjóra frá Efri-Rauðalæk í Holtum, f. 30. september 1943. Foreldrar hans voru hjónin Haraldur Halldórsson bóndi, f. 13. október 1897, d. 21. mars 1978, og Ólafía Hrefna Sigurþórsdóttir bóndi, f. 11. desember 1907, d. 12. janúar 1988. Börn Sigrúnar og Vals eru: 1) Þorsteinn Valsson, vélvirki, f. 2. febrúar 1966, sambýliskona Guðbjörg Sigurðardóttir, f. 18. ágúst 1967. Börn þeirra eru Victor Bjarmi, f. 25. ágúst 1990, og Harpa Sif, f. 1. febrúar 1994. Fyrri sambýliskona Þorsteins er Alda Agnes Sveinsdóttir, f. 3. maí 1961. Þeirra dóttir er Agnes, f. 3. febrúar 1985. Hennar sambýlismaður er Böðvar Stefánsson, f. 3. júní 1981 og er dóttir þeirra Embla María, f. 29. desember 2005. 2) Elínborg Valsdóttir, grunnskólakennari, f. 14. febrúar 1968, gift Aðalsteini Hákonarsyni, f. 30. janúar 1965. Fyrrverandi sambýlismaður Elínborgar er Hermann Jón Einarsson, f. 28. febrúar 1961, og eiga þau þrjú börn, Valdísi, f. 1. júlí 1989, Einar Bjarna f. 1. desember 1995, og Jóhann, f. 5. nóvember 1997. 3) Ólafur Valsson, kerfisfræðingur, f. 10. október 1969. Hans kona er Sigríður Kristín Sigurðardóttir, f. 28. september 1967. Þeirra börn eru Sigrún Inga, f. 13. ágúst 1991, Hugrún Lilja, f. 30. desember 1995, og Guðjón Valur, f. 12. nóvember 2001.

Sigrún ólst upp á Árbakka. Hún gekk í barnaskóla á Skammbeinsstöðum í Holtum en fór síðan í Kvennaskólann í Reykjavík og útskrifaðist þaðan 1961. Hún fluttist að Hellu í mars 1969 og starfaði við sauma. Hún starfaði sem kennari við Grunnskólann á Hellu 1976-2001 og kenndi þar handmennt en auk þess tónmennt síðustu 15 árin. Sigrún vann einnig á bókasafni skólans með kennslunni í nokkur ár. Hún hóf réttindanám í fjarnámi við Kennaraháskóla Íslands 1988 og lauk því vorið 1992 og kenndi allan tímann með náminu. Eftir áralangan feril sem tónlistarmaður ákvað Sigrún að læra nótur og fór því í klarínettunám og lærði síðan á harmoniku.

Sigrún var formaður Ungmennafélagsins Merkihvols 1965, í stjórn Héraðsvöku Rangæinga 1982-1983, formaður Harmonikufélags Rangæinga 1988-1997 og formaður Landsambands harmonikuunnenda 1996-1999.

Útför Sigrúnar verður gerð frá Árbæjarkirkju í Holtum í dag og hefst athöfnin klukkan 13.