Rafíþróttamót sameinar ungt fólk á landsvísu

Á Rafíþróttamóti Samfés og Elko sem haldið var um helgina í Íþróttahúsinu Digranesi voru samtals 198 ungmenni á aldrinum 13-25 ára skráð til leiks á ört stækkandi viðburði öflugs samfélags ungs fólks sem hefur áhuga á rafíþróttum.

Þátttakendur á móti helgarinnar sem komu voru meðal annars frá Húsavík, Vestmannaeyjum, Hvolsvelli, Suðurnesjum, Þorlákshöfn og af höfuðborgarsvæðinu. Spilað og keppt var meðal annars í Fortnite, Valorant, FIFA, CS:GO, League of Legends, Rocket League og VR-leikjunum Gorilla tag og Pavlov.

Áhersla var lögð á að þátttakendur geti líka mætt, haft gaman og spilað án þess að keppa á mótinu.

Virkja ungt fólk og draga úr einangrun

Markmiðið mótsins var meðal annars að ná til ungs fólks, virkja til þátttöku, draga úr félagslegri einangrun og stuðla að jákvæðri þróun í rafíþróttum.

Starfsfólk mótsins og þátttakendur voru sammála því að mótið einkenndist af almennri gleði, hamingju og að ungt fólk hafi haft gaman af því að spila saman og kynnast.

Það er mjög ánægjuleg þróun að síðan Samfés byrjaði að halda rafíþróttaviðburði hefur einnig þátttaka ungs fólks á aldrinum 16-25 ára aukist með góðu samstarfi við ungmennahúsin og aðra aðildarfélaga Samfés.

Kostaði ekki inn á mótið

Unga fólkið er nú þegar farið að hlakka til næsta móts og munu þau líka geta tekið þátt á Norræna rafíþróttamótinu Nordic E-sport United sem er samstarfsverkefni Samfés, Ungdomsringen og Ungdom og Fritid.

Félagsmiðstöðvar í Kópavogi fá sérstakar þakkir fyrir samvinnuna á mótinu sem er komið til að vera í Digranesi.

Það var frítt að vera með á mótinu og kostaði allt í sjoppunni 100 til 150 krónur en þar mátti kaupa gos, vatn, nammi og pizzu.

• Blogga um frétt