Þýskalandsmeistarar Bayern München eru úr leik í þýsku bikarkeppninni í knattspyrnu karla eftir 0:5 stórtap gegn Borussia Mönchengladbach í 32-liða úrslitum keppninnar í kvöld.
Bæjarar sáu ekki til sólar í Mönchengladbach í kvöld og voru lentir 0:3 undir eftir aðeins 21. mínútu leik.
Tvö mörk frá Ramy Bensebaini og eitt frá Manu Koné sáu til þess að Þannig stóðu leikar í hálfleik.
Breel Embolo bætti svo við tveimur mörkum áður en klukkutími var liðinn af leiknum og þar við sat.
Um er að ræða stærsta tap Bayern í sögu félagsins í þýsku bikarkeppninni og stærsta tap þess í 43 ár, þegar liðið tapaði 1:7 fyrir Fortuna Düsseldorf í þýsku 1. deildinni árið 1978.
Stærsta tapið í sögu félagins er 0:7 gegn Schalke á heimavelli í 1. deildinni árið 1976.