Aðdáendahópur Hatara spannar vítt svið, allt frá leikskólabörnum til eldhressra eldri borgara, en nú hafa óvæntir aðdáendur bæst í hópinn, sjálfir Prúðuleikararnir.
Í myndskeiði sem YouTube-notandinn Mark Marcia Jenkins hefur klippt til af einstakri snilld má sjá Dýra (e. Animal) og Svínku (e. Miss Piggy) bregða sér í hlutverk Matthíasar Tryggva Haraldssonar og Klemens Hannigan. Myndskeiðið má sjá hér að neðan.
Ætli Prúðuleikararnir gætu náð lengra en liðsmenn Hatara á sviðinu í Tel Aviv í maí? Við munum líklega aldrei komast að því en það skýrist eftir 34 daga hvort Ísland komist í fyrsta skipti áfram upp úr undankeppninni síðan 2014, þegar liðsmenn Hatara stíga á svið á fyrra undankvöldi Eurovision.