Raunveruleikaþáttastjarnan Kylie Jenner er einlæg í nýrri færslu á Instagram. Þar opnar hún sig um að hafa glímt við kvíða síðan hún var unglingur og hvernig kvíðinn hafði áhrif á hana eftir að hún eignaðist dóttur sína.
„Mér leið eins og ég þyrfti að finna sjálfa mig algjörlega upp á nýtt. Ég held mörgu fyrir sjálfa mig en mig langaði bara að deila með ykkur og láta ykkur vita að ég er mannleg. Líf mitt er ekki fullkomið og það sem þið sjáið hér á samfélagsmiðlum er bara yfirborðið,“ skrifar Jenner í nýjustu færslu sinni.
Jenner hefur alist upp í sviðsljósinu en hún var aðeins 9 ára gömul þegar tökur hófust á raunveruleikaþáttunum Keeping up With the Kardashians, sem fjalla um fjölskyldu hennar.
„Að vaxa úr grasi fyrir framan milljónir manna er ekki venjulegt. Ég hef misst vini og ég hef tapað sjálfri mér stundum. Fyrsta húðflúrið mitt var „heilbrigð skynsemi“ (e. sanity) til að minna mig á að halda henni,“ skrifar Jenner.
Jenner nýtur nú lífsins á Turks- og Caicoseyjum í Karíbahafinu ásamt vinkonum sínum og dóttur sinni.