Flestir þeirra forsetaframbjóðenda sem mælast með mest fylgi ætla að halda sig heima á Íslandi í kosningabaráttunni. 

Eins og mbl.is greindi frá fyrr í dag hélt Halla Hrund Logadóttir forsetaframbjóðandi fund í Kaupmannahöfn í Danmörku í dag. 

Frétt af mbl.is

Halla Hrund heldur kosningafund í Kaupmannahöfn

mbl.is hafði samband við framboð þeirra fimm frambjóðenda sem hafa mælst með mest fylgi, fyrir utan Höllu Hrund, og spurði hvort útlandaferð væri á dagskrá.

Netfundir vinsælir

Samkvæmt upplýsingum frá framboði Katrínar Jakobsdóttur er óvíst hvort hún fari erlendis, en Katrín verður með fund í beinu streymi, sem er hugsaður fyrir Íslendinga sem búa erlendis, 14. maí kl. 18.

Janus Arn Guðmundsson, sem er í kosningateymi Baldurs Þórhallssonar, býst ekki við því að Baldur haldi fund erlendis. „Það var hugmynd um að senda hann út, en þetta hefur ekki komist inn í dagskrána. Ég geri ekki ráð fyrir því héðan af að við gerum það, en það er samt smá möguleiki,“ segir Janus í samtali við mbl.is.

Baldur var þó í beinu streymi í dag kl. 15. Fundurinn var sérstaklega ætlaður Íslendingum sem búa erlendis. Janus segir að mögulega verði fleiri netfundir haldnir.

Nýr forseti verður kjörinn 1. júní. mbl.is/Kristinn Magnússon

Samkvæmt upplýsingum frá framboði Jóns Gnarr er mjög ólíklegt að hann geri sér ferð til útlanda, enda sé hann í fullri vinnu meðfram því að vera forsetaframbjóðandi.

Jón er með opinn fund sem hófst klukkan 20 í Aðalstræti 11 í miðbæ Reykjavíkur, en fundurinn er einnig í beinu streymi.

Arnar Þór Jónsson segist hafa íhugað að halda fundi erlendis en sér ekki fyrir sér að gera það vegna tímaskorts. Þá kveðst hann ætla halda fundi í beinu streymi fyrir Íslendinga erlendis á næstu vikum. 

Halla Tómasdóttir er heldur ekki á leið til útlanda, en hún er með fundi í beinu streymi á hverjum þriðjudegi. Þá hefur hún einnig haldið aðra fundi í beinu streymi sem hún auglýsir sérstaklega á Facebook-síðu sinni.