Kannanir benda til þess að hægrimenn sigri í þingkosningunum í Slóveníu sem fara fram í dag. Janez Jansa, forsætisráðherra Slóveníu árin 2004 til 2008 og 2012 til 2013, og Demókrataflokkur hans mælist með 25 prósenta fylgi í skoðanakönnunum, um tvöfalt stærri en næsti flokkur á eftir. 1,7 milljón manna er á kjörskrá og þingsætin eru 90 talsins.
Undanfarin fjögur ár hefur verið miðju-vinstristjórn í landinu og fór kjörsókn betur af stað í morgun en fyrir fjórum árum. SMC-flokkur fráfarandi forsætisráðherra landsins, Miro Cerar, sem sagði af sér og boðaði til kosninga í mars sl. eftir röð verkfalla í opinbera geira landsins og harðra átaka mælist með 9,3 prósenta fylgi.
Í frétt AFP um málið segir að það gæti þó reynst erfitt fyrir Jansa að mynda meirihluta þrátt fyrir að flokkur hans hljóti flest atkvæða þar sem núverandi stjórnarflokkarnir þrír; Sósíaldemókratar, SMC og DESUS, hafa útilokað samstarf við flokkinn.