Hættan á glundroða í kringum útgöngu Breta úr Evrópusambandinu hefur aldrei verið jafn mikill, segir Michel Barnier, aðalsamningamaður Evrópusambandsins í viðræðum við bresk stjórnvöld um Brexit. ESB geti ekki gengið lengra í að reyna að sannfæra þingmenn á breska þinginu um samningsdrögin og málið sé í höndum Breta.
Hann hefur vissar efasemdir um tilganginn með því að framlengja viðræðunum fram yfir 29. mars, daginn sem Bretar ganga út úr ESB. Klukkan 19 í dag verða greidd atkvæði um það á breska þinginu hvort stöðva eigi áform um útgöngu þann dag. Aðeins verða greidd atkvæði um dagsetninguna ekki hvort horfur séu á útgöngu án samnings síðar á árinu.
Á meðan rætt er um framhaldið segir Barnier tímabært að Bretar taki afleiðingum gjörða sinna.
Neðri deild breska þingsins hefur á ný sagt nei við samningnum og nú er það í höndum Breta að rata út úr þessari blindgötu. Líkurnar á samningslausri útgöngu hafa aldrei verið meiri en nú. Evrópusambandið hafi gengið eins langt og mögulegt er til þess að sannfæra þingmenn um ágæti samningsins, meðal annars varðandi landamæri Írlands.