Telur af­sögn Stur­geon ekki tengjast rann­sókninni

Búið er að innsigla heimili fyrrverandi forsætisráðherra Skota, Nicolu Sturgeon og eiginmanns hennar, Peter Murrell. Murrell var handtekinn í morgun á heimili hjónanna í útjaðri Glasgow vegna rannsóknar skosku lögreglunnar á fjármálum Skoska þjóðarflokksins (SNP).

Frétt af mbl.is

Eiginmaður Sturgeon handtekinn

Stutt er síðan hjónin hættu störfum sínum innan flokksins en Murrell sagði upp sem framkvæmdastjóri flokksins í síðasta mánuði. Murrell sagði upp vegna deilna sem ágerðust um gagnsæi flokksins og fjölda meðlima í flokknum. Tók hann ábyrgð á því að hafa ýkt meðlimatölur flokksins. Hann sagði meðlimi vera um hundrað þúsund þegar þeir voru í raun um 72 þúsund. Sturgeon sagði af sér sem forsætisráðherra um miðjan febrúar.

Þessu greinir skoski miðillinn The Herald frá.

Sturgeon ekki á staðnum 

Murrell var leiddur út af heimili sínu í handjárnum í morgun en samkvæmt umfjöllun Telegraph  mætti lögreglan á heimili hjónanna um tuttugu mínútum eftir að Sturgeon keyrði af svæðinu.

Hér má sjá hjónin. Sturgeon og Murrell. AFP/Robert Perry

Gagnasöfnun og húsleit lögreglu stendur nú yfir á heimilinu vegna málsins. Þar að auki leitar lögregla í hinum ýmsu húsnæði flokksins, þar á meðal í Edinborg. Fjármagnið sem er til rannsóknar eru 600 þúsund pund eða um 105,3 milljónir króna sem eyrnamerkt voru fyrir kosningabaráttu flokksins.

Hér að ofan má sjá lögregluna ganga um höfuðstöðvar flokksins í Edinborg.

Arftaki Sturgeon í starfi, Humza Yousaf, segir mikilvægt fyrir flokkinn að vera eins gagnsær og mögulegt er á meðan á rannsókn stendur, hann muni vinna með lögreglu. Þá hafi hann aldrei sinnt neinu hlutverki innan flokksins sem hafi veitt honum aðgang að fjármálum þess.

Sagði af sér þremur dögum síðar

Spurður hvort hann telji að yfirvofandi handtaka eiginmanns hennar hafi verið ástæðan að baki afsagnar Sturgeon hafnar hann því og segir arfleifð Sturgeon standa fyrir sínu.

Frétt af mbl.is

Sturgeon segir af sér

Humza Yousaf, nýr leiðtogi SNP. AFP/Andy Buchanan

Greint var frá því þann 12. febrúar að lögregla hefði haft samband við hátt setta aðila innan flokksins vegna rannsóknarinnar en þann 15. segir Sturgeon af sér.

Yousaf segist trúa röksemdafærslu Sturgeon fyrir afsögninni, að hún hafi í raun verið orðin of þreytt í starfi til þess að sinna því áfram. Þar nefnir hann til dæmis að kórónuveirufaraldurinn og allt umstang í kringum hann hafi verið mjög þreytandi verkefni.

• Blogga um frétt