Volodimír Selenskí Úkraínuforseti hefur hvatt Vesturlönd til að útvega landinu loftvarnakerfi eftir að 17 særðust í flugskeytaárás Rússa á Kænugarð, höfuðborg Úkraínu, og nágrenni í nótt.
Úkraínski flugherinn segist hafa skotið niður 31 rússneskt flugskeyti sem hafi verið beint að Kænugarði. Árásin var gerð eftir að rússnesk stjórnvöld hétu því að bregðast við fjölgun úkraínskra árása á svæði við landamæri landanna tveggja.
„Þessi ógn heldur áfram hvern dag og hverja nótt,” sagði Selenskí á Telegram.
„Það er mögulegt að binda enda á þetta með alþjóðlegri samstöðu…rússneskir hryðjuverkamenn eiga ekki flugskeyti sem komast fram hjá Patriot eða öðrum góðum kerfum heimsins,” sagði Selenskí og átti við loftvarnakerfið.
„Við þurfum á þessari vernd að halda í Úkraínu núna.”
Neyðarpakki fyrir Úkraínu upp á 60 milljarða dollara vegna hergagna hefur verið lagður fyrir bandaríska þingið en ekki er búið að samþykkja hann.