„Þetta er náttúrulega ógurlega stórt“

Stór borgarísjaki er nú fastur á besta blettinum, segir Guðmundur Gísli Geirdal á Gísla KÓ-10 í samtali við mbl.is. Borgarísjakinn er við Hornbanka um 40 mílur norðaustur af Horni og hefur hann strandað á um það bil 100 metra dýpi. „Þetta er náttúrulega ógurlega stórt. Ég fór alveg að honum og það var að brotna aðeins úr honum,“ segir Guðmundur.

Hér sést Glær KÓ-9 við borgarísjakann. Ljósmynd/Aðsend

„Hann er þarna á bletti þar sem ég hef verið að veiða voðalega stóran fisk og ég fór alveg upp að honum og náði þar í svolítið mikið af þessum stóra. Fékk alveg fjögur kör af fiski sem var allur yfir 20 kíló. Það er náttúrulega bara ævintýri,“ segir hann.

Guðmundur Gísli Geirdal. Ljósmynd/Aðsend

Guðmundur hefur verið ásamt syni sínum Axel Erni Guðmundssyni, sem er á Glæ KÓ-9, að veiða þorsk á svæðinu í kringum ísjakann síðustu daga. „Þetta er voða gaman að vera svona saman að þessu,“ segir Guðmundur.

Ljósmynd/Aðsend

Veðurstofan tilkynnir annan ísjaka

Nokkuð stór borgarísjaki með tvo turna er nú staddur um 6 kílómetra norðvestur af Reykjaneshyrnu, um 18 kílómetra frá landi og hefur færst nokkuð vestar í dag samkvæmt tilkynningu Veðurstofu Íslands.

• 1 blogg um fréttina

Bloggað um fréttina

• Ómar Ragnarsson: Útsendari Grænlandsjökuls í heimsókn.