Varðskipið Týr er komið á strandstað þar sem báturinn Einar Guðnason ÍS strandaði við Gölt á utanverðum Súgandafirði í gærkvöld. Samkvæmt upplýsingum frá Landhelgisgæslunni er báturinn ónýtur og marar í kafi.
Áhöfn varðskipsins og eigendur bátsins koma til með að hreinsa upp brak og annað rusl við strandstað í dag.
Mannbjörg varð þegar báturinn strandaði við Gölt á utanverðum Súgandafirði í gærkvöldi en neyðarkall barst frá bátnum um klukkan 22:00. Fjórir voru um borð.
Eins og áður hefur komið fram voru aðstæður erfiðar á vettvangi sökum brims. Þyrla Landhelgisgæslunnar kom á vettvang skömmu fyrir tólf á miðnætti og voru skipverjarnir allir komnir í þyrluna á miðnætti og fluttir til Ísafjarðar.