„Brýnt að við beitum okkur frekar til að ná í þetta fólk“
Setja bókamerki
„Staðan á Rafah eykur auðvitað enn mikilvægi þessa máls,“ segir Katrín Jakobsdóttir, forsætisráðherra innt eftir stöðu mála á dvalarleyfishöfum á Íslandi, sem enn hafa ekki komist út af Gasasvæðinu.
Blaðamaður mbl.is gaf sig á tal við forsætisráðherra að ríkisstjórnarfundi loknum en utanríkisráðherra baðst undan viðtali.
Katrín segir lista yfir dvalarleyfishafana þegar hafa verið senda á sendiskrifstofur í Egyptalandi og Ísrael og því allt klappað og klárt í þeim málum. Nú þurfi aftur á móti að beita sér frekar svo að fólkið komist til Íslands.
„Að mínu viti er mjög brýnt að við beitum okkur frekar til að ná í þetta fólk, því ég tel þetta vera fordæmalausar aðstæður,“ segir forsætisráðherra að lokum.
Óbreyttir borgarar koma nú fólki yfir landamærin
Þrjár íslenskar konur eru nú staddar í Kaíró og hefur þeim þegar tekist að koma einni fjölskyldu yfir landamærin.
Þótti mörgum það skjóta skökku við að þrír óbreyttir borgarar gætu áorkað slíkt á skömmum tíma í ljósi þess að ríkisstjórnin og utanríkisráðherra, Bjarni Benediktsson, hafi ítrekað lýst aðgerðinni sem flókinni.
Bjarni sagði umsóknir Palestínumanna settar í forgang
Bjarni sat fyrir svörum hjá Jóhönnu Vigdísi Hjaltadóttur í fréttatíma RÚV á þriðjudaginn og gat þar ekki gefið skýr svör um hvort ráðuneytið hygðist sækja fólkið en sagði málið til skoðunar.
Benti hann ítrekað á að útlendingamál væru komin í óefni hér á landi og að Ísland gæti ekki tekið endalaust við fólki. Minnti Jóhanna Vigdís hann þá á að fólkið sem um ræddi hefði þegar fengið samþykkt dvalarleyfi hér á landi.
Þess má geta að Bjarni lýsti því yfir í desember að umsóknir um fjölskyldusameiningar Palestínumanna hér á landi yrðu settar í forgang hjá Útlendingastofnun í ljósi ástandsins fyrir botni Miðjarðarhafs.
Fréttin hefur verið uppfærð.
Var sofandi þegar slökkvilið bar að garði
„Miklar líkur á rýmingu á næstu sólarhringum“
Eldgosinu er lokið
Næsta eldgos fær mikið forskot
Eldgosinu lokið en getum búist við öðru
Magnús Tumi: Gýs líklega á næstu dögum
Vannýtt alþjóðleg tækifæri í heilbrigðiskerfinu
